مبینہ آڈیو لیک پر پرویز الٰہی اور ان کے وکلا پر مقدمہ درج کرکے گرفتار کیا جائیگا، رانا ثنا

لاہور (انتخاب نیوز) وزیر داخلہ نے پرویز الہی اور ان کے وکلا کی مبینہ آڈیو جاری کردی جس میں پرویز الہی مقدمہ اپنی مرضی سے لگوانے کی بات کررہے ہیں، رانا ثنا اللہ نے ایف آئی اے کو وزارت قانون سے آڈیو لیک کے معاملے پر رائے لینے کی ہدایت کرتے ہوئے پرویز الہی کے خلاف مقدمہ درج کرانے کا عندیہ دے دیا۔ اس حوالے سے وزیر داخلہ رانا ثنا اللہ نے اسلام آباد میں پریس کانفرنس کی جس میں یہ آڈیو جاری کی گئی۔ آڈیو میں مبینہ طور پر سابق وزیر اعلیٰ پنجاب چوہدری پرویز الہی اپنے وکیل کو ایک کیس مرضی کے جج کے پاس لگوانے کی ہدایات دے رہے ہیں۔ آڈیو کا متن : پرویز الہی: جوچا صاحب۔ جوچا: جی جی۔ پرویز الہی: مظاہر علی نقوی کے پاس لگوانا ہے محمد خاں کا کیس۔ جوچا: اچھا۔۔چلو۔۔ آج وہ اسلام آباد چلا جائے گا۔۔ ہم اسلام آباد بھیج دیں گے۔ پھر جو طریقہ کار ہوگا اس کے پیچھے کوشش کرلیں گے۔ پرویز الہی: کراﺅ ناں جی۔ جوچا: بالکل کوشش کرلیں گے جی۔ جوچا: مظاہر علی اکبر نقوی۔ پرویز الہی : ہاں۔ پرویز الہی: بس ٹھیک اے جی۔ پرویز الہی: بڑا دبنگ ہے۔ جوچا: جی۔۔ہاں۔۔۔ ہے۔۔ جانتا ہوں میں۔ وزیر داخلہ رانا ثنا اللہ نے پریس کانفرنس کرتے ہوئے کہا کہ پرویز الہی کے خلاف مقدمہ درج کیا جائے اور پرویز الہیٰ کو گرفتار کرکے اس معاملے کی تحقیقات کی جائے گی، آڈیو کی فرانزک میں شواہد ان کے خلاف ملے تو مقدمہ درج ہوگا۔ رانا ثنا اللہ نے مزید کہا کہ اگر یہ معاملہ مزید آگے بڑھتا ہے تو اس کو جوڈیشل کمیٹی کے پاس بھیجا جائے گا تاکہ عدلیہ کا ادارے کا احترام محفوظ رہے۔

اپنا تبصرہ بھیجیں