رمضان المبارک کا چاند کل نظر آنے کی پیشگوئی،ہلال کمیٹی اور مفتی پوپلزئی نے آج اجلاس بلالئے

کراچی (اسٹاف رپورٹر)پاکستان میں رمضان المبارک کا چاند 22مارچ بروزبدھ کو نظرآنے کی پیشگوئی کی گئی ہے۔محکمہ موسمیات کے مطابق قوی امکان ہے کہ ماہ مبارک کا چاند 22 مارچ کو نظرآجائے گا اور جمعرات 23 مارچ کو پہلا روزہ ہوگا۔بتایا گیا ہے کہ رمضان المبارک کے چاند کی پیدائش 21 مارچ کی شب 10بج کر23 منٹ پرہوگی، اس طرح سے اگلے روز مغرب کے وقت چاند کی عمر 20 گھنٹے سے زائد ہوگی۔محکمہ موسمیات کے مطابق 22 مارچ کو 6 بج کر41منٹ غروب آفتاب جب کہ غروب قمر7 بج کر 32 منٹ پرہوگا۔رمضان المبارک کا چاند دیکھنے کے دوران کراچی میں مطلع کہیں صاف اور کہیں ابرآلود رہنے کا امکان ہے۔ پشاور کی غیرسرکاری رویت ہلال کمیٹی مسجد قاسم علی خان نے رمضان المبارک کا چاند دیکھنے کیلئے 22 مارچ کو اجلاس بلالیا۔رمضان المبارک کا چاند دیکھنے کیلئے مرکزی رویت ہلال کمیٹی کا اجلاس 22 مارچ کو پشاور میں ہوگا۔اجلاس کی صدارت چیئرمین مرکزی رویت ہلال کمیٹی مولانا عبدالخبیر آزاد کریں گے اور اوقاف ہال میں اجلاس میں رمضان کے چاند سے متعلق اعلان کیا جائے گا۔دوسری جانب پشاور کی غیرسرکاری رویت ہلال کمیٹی نے رمضان کا چاند دیکھنے کیلئے مسجد قاسم علی خان میں اجلاس 22 مارچ کو طلب کرلیا ہے۔اجلاس کی صدرات مفتی شہاب الدین پوپلزئی کریں گے۔رمضان المبارک کا چاند دیکھنے کیلئے زونل رویت ہلال کمیٹی کا اجلاس ڈی سی آفس کوئٹہ میں کمیٹی کے چیئرمین مولانا انوار الحق حقانی کے زیر صدارت کل 22 مارچ بروز( بدھ) بمطابق 29 شعبان کو منعقد ہو گا۔