ممنوعہ فنڈنگ کیس، الیکشن کمیشن کو شوکاز نوٹس کیخلاف پی ٹی آئی کے اعتراضات پر سماعت کا حکم
اسلام آباد(مانیٹرنگ ڈیسک)اسلام آباد ہائیکورٹ نے ممنوعہ فنڈنگ کیس میں الیکشن کمیشن کو شوکاز نوٹس کے خلاف پی ٹی آئی کے اعتراضات پر سماعت کا حکم دے دیا۔اسلام آباد ہائیکورٹ کے جسٹس بابر ستار نے ممنوعہ فنڈنگ کیس میں شوکاز نوٹس پر پی ٹی آئی کے اعتراضات پر الیکشن کمیشن کا فیصلہ کالعدم قرار دینے کا حکم سنایا۔ عدالت نے الیکشن کمیشن کے فیصلے کے خلاف پی ٹی آئی کی درخواست منظور کر لی۔پی ٹی آئی کی جانب سے وکیل انور منصور عدالت کے سامنے پیش ہوئے۔ عدالت نے حکم دیا کہ پی ٹی آئی کے اعتراضات سنتے ہوئے فیئر ٹرائل کے تمام تقاضے پورے کئے جائیں۔عدالت نے وکیل الیکشن کمیشن سے استفسار کیا کہ لارجر بینچ نے فیصلہ دیا ہے آپ اس کے مطابق کارروائی آگے کیوں نہیں بڑھا رہے، آپ عدالت کا وقت کیوں ضائع کر رہے ہیں ۔ وکیل الیکشن کمیشن نے موقف اپنایا کہ پٹیشنر کے خلاف شوکاز کی کوئی کارروائی شروع نہیں کی گئی، دیگر گواہوں کو جرح کے لئے طلب کیا گیا۔جسٹس بابر ستار نے استفسار کیا کہ درخواست گزار کو کیس کی سماعت کا موقع کیوں نہیں دیا ، آخر ایسی کیا بات تھی الیکشن کمیشن کو فیصلے میں سمجھ نہیں آئی۔ عدالت نے ریمارکس دیئے کہ آپ کو کس نے کہا کہ آپ ہائی کورٹ کے آڈر کے پابند نہیں ہیں۔عدالت نے پی ٹی آئی کی درخواست منظور کرکے الیکشن کمیشن کو کارروائی آگے بڑھانے کی ہدایت کر دی۔
