پاکستان ڈیفالٹ تک پہنچانے والے سیاستدان، ججز اور جرنیل نا قابل معافی ، احتساب کرینگے ، نواز شریف

لاہور (آن لائن) مریم نواز شریف کی زیر صدارت پاکستان مسلم لیگ (ن) پنجاب کا گرینڈ مشاورتی اجلاس منعقد ہوا۔ پاکستان مسلم لیگ (ن) کے قائد محمد نواز شریف نے وڈیو لنک کے ذریعے اجلاس میں شرکت کی۔ نواز شریف کے اجلاس میں شرکت پر شرکائ نے کھڑے ہو کر اور بھرپور تالیوں سے اپنے قائد کا استقبال کیا۔ پاکستان مسلم لیگ (ن) کے نائب صدر حمزہ شہباز شریف، سیکرٹری جنرل احسن اقبال، پنجاب کے صدر رانا ثنا اللہ خاں، پنجاب سے سابق ارکان قومی و صوبائی اسمبلی اور ٹکٹ ہولڈرز نے اجلاس میں شرکت کی۔ پنجاب کے پی پی سطح کے تمام ڈویڑنز اور اضلاع کے عہدیدار بھی اجلاس میں شریک ہوئے۔ مریم نوازشریف نے اجلاس کو قائد نوازشریف کی واپسی کے حوالے سے تیاریوں پر بریفنگ دی۔ مریم نواز شریف نے اجلاس کو بریفنگ دیتے ہوئے بتایا کہ قائد نواز شریف کے استقبال کے لئے پارٹی کے مرکزی سیکریٹیریٹ میں ‘سینٹرل فسیلی ٹیشن کنٹرول سینٹر’ قائم کر دیا گیا۔ چیف آرگنائزر کے طور پر مریم نواز شریف نے پی پی، وارڈ، ڈویڑن، ضلع اور تحصیل کی سطح پر تیاریوں اور تنظیمی اشتراک عمل کے بارے میں تفصیلات سے آگاہ کیا۔ مریم نواز نے بریفنگ میں بتایا کہ ‘سینٹرل فسیلی ٹیشن کنٹرول سینٹر’ قائد نواز شریف کے استقبال کے حوالے سے مرکزی کردار ادا کرے گا۔ انہوں نے کہا کہ 21 اکتوبر کو عوام نواز شریف کا تاریخی استقبال کرکے پاناما اور اقاما کے ڈرامہ سازوں کو ہمیشہ کے لئے دفن کر دیں گے۔ اجلاس سے خطاب میں حمزہ شہباز نے کہا کہ نوازشریف نے زخم کھا کر بھی پاکستان کے زخموں پر مرہم رکھا ہے، نوازشریف نے پاکستان کو ایٹمی ملک بنایا، آج اسے بھکاری ملک بنادیا گیا جو باعث شرم ہے، نوازشریف کو وزیراعظم بناکر عوام اپنے بچوں کا مستقبل محفوظ بنائیں گے، نوازشریف کے وزیراعظم بننے کا مطلب مہنگائی کے عذاب کم کرنا ہے، قائد نوازشریف کا استقبال کریں گے، ترقی اور خوش حالی کا استقبال کریں گے۔ حمزہ شہباز نے مزید کہا کہ کسان ، محنت کش، دیہاڑی دار، طالب علم، استادسب نوازشریف کی راہ دیکھ رہے ہیں، قوم کو سوال پوچھنا چاہیے کہ نوازشریف کے دور کے بعد مہنگائی کیوں ہوئی؟ نوازشریف نے عوام کو ریلیف دیا تھا، پھر کس نے عوام کو تکلیف دی ؟ سابق وفاقی وزیر احسن اقبال نے اجلاس سے خطاب کرتے ہوئے کہا کہ نواز شریف کی قیادت میں 2013 سے 2018 پاکستان کی تیز ترین ترقی کا دور تھا، پاکستان کی ترقی کے عمل کو ایک سازش کے تحت روکا گیا، نواز شریف ہی نہیں، پاکستان کی ترقی، سی پیک اور پاکستان کے دوست ممالک کے خلاف بھی سازش ہوئی، عوام کا مضبوط مینڈیٹ پاکستان کے خلاف ہونے والی سازش کے اثرات ختم کرنے میں مددگار ثابت ہو گا۔ سابق وفاقی وزیر رانا ثنائ اللہ نے کہا کہ نوازشریف کی سیاست پاکستان کی ترقی اور عوام کی خوش حالی ہے، نوازشریف کے خلاف سازش اصل میں عوام اور پاکستان کے خلاف سازش ہوتی ہے، جب پاکستان ترقی کرتا ہے، اسے گرایا جاتا ہے، پاکستان کی ترقی سے چند کرداروں کو تکلیف ہوگئی، نوازشریف حکومت ختم نہ ہوتی تو مہنگائی ختم ہوچکی ہوتی، جمہوریت ناکام نہیں ہوئی، جمہوریت کو ناکام بنایا گیا۔ رانا ثنائ اللہ نے مزید کہا کہ سازش نہ ہوتی تو آج پاکستان بھیک مانگنے پر مجبور نہ ہوتا، پاکستان لوٹنے والے صداقت اور امانت کے سرٹیفکیٹ بانٹتے رہے، قوم نوازشریف کا استقبال کرکے پاکستان کی ترقی کے ایجنڈے کا ساتھ دے گی، نوازشریف کا استقبال معیشت تباہ اور عوام کو مہنگائی کے دکھ دینے والے سیاہ کرداروں کی مذمت کا دن ہوگا۔