تمام سیاستدانوں کو انتخابات سے قبل حفاظتی ضمانت کرالینی چاہیے، پرویزالٰہی

اسلام آباد(مانیٹرنگ ڈیسک)سابق وزیراعلیٰ پنجاب اورپاکستان تحریک انصاف کے صدر چوہدر ی پرویز الٰہی نے کہا ہے کہ جو حالات ہیں اس میں تمام سیاستدانوں کو انتخابات سے قبل حفاظتی ضمانت کروالینی چاہیے ۔اسلام آباد کی انسداد دہشت گردی کی عدالت کے احاطے میں چوہدر ی پرویز الٰہی نے صحافیوں سے غیر رسمی گفتگو میں کہا کہ میری رہائی کی بات اللہ تعالی ہی بہتر جانتے ہیں، چیئرمین پی ٹی آئی سے بیک ڈور مذاکرات پر کچھ نہیں کہہ سکتا، چودھری شجاعت حسین سے دوبارہ ملاقات ہوئی۔صحافی کے اس سوال پر کہ بلاول زرداری نے کہا کہ شیخ رشید اور پرویز الٰہی اندر رہیں یا باہر کوئی فرق نہیں پڑتا، پرویز الٰہی نے جواب دیا کہ بلاول بھٹو کو اپنی سالگرہ خوشی سے منانے دیں۔انہوںنے کہا کہ جیل کا کھانا دیا جاتا ہے جس سے طبیعت ناساز رہتی ہے، جیل میں پہلے ڈاکٹر کی سہولت میسر تھی، اب ان کو اس میں بھی مسائل نظر آنے لگے ہیں۔پرویز الٰہی نے کہا کہ بجلی مہنگی ہونے کے اصل ذمہ دار نواز شریف اور شہباز شریف ہیں، مہنگائی سے عام آدمی ختم ہو چکا ہے، عام انتخابات نہ ہونے سے ملک کا نظام رکا ہوا ہے۔صحافی کے سوال پر کہ سننے میں آ رہا ہے کہ نواز شریف کی ملک واپسی کی تاریخ بدل رہی ہے ۔انہوںنے کہا کہ سننے میں یہ بھی آرہا ہے کہ نوازشریف کی ملک واپسی کی تاریخ بدل رہی ہے، نواز شریف خود بھی بدل گئے ہیں۔ بعدازاں چیئرمین پی ٹی آئی کی پیشی کے موقع پر توڑ پھوڑ سے متعلق کیس کی سماعت میں پرویز الہی کو جوڈیشل ریمانڈ مکمل ہونے پر پیش کیا گیا، عدالت نے پرویز الہی کی تھانہ سی ٹی ڈی میں درج مقدمے میں ضمانت منظور کر رکھی ہے۔