عمران خان کی درخواست ضمانت بحالی کا تفصیلی فیصلہ جاری

اسلام آباد (مانیٹرنگ ڈیسک) 9 مئی واقعات سمیت مقدمات میں چیئرمین پی ٹی آئی و سابق وزیر اعظم عمران خان کی درخواست ضمانت بحالی کا تفصیلی فیصلہ جاری کر دیا گیا۔اسلام آباد ہائیکورٹ کے چیف جسٹس عامر فاروق کی سربراہی میں 2 رکنی بینچ نے 6 صفحات کا فیصلہ جاری کر دیا جس میں کہا گیا ہے کہ چیئرمین تحریک انصاف کا حاضری سے استثنیٰ بھی بحال کیا جاتا ہے، چیئرمین پی ٹی آئی جان بوجھ کر عدالت سے غیر حاضر نہیں ہوئے، ضمانت منسوخی کے باوجود ریاست نے چیئرمین پی ٹی آئی کو گرفتار نہیں کیا۔ٹرائل کورٹ یہ نقطہ دیکھتے ہوئے درخواست ضمانت پر فیصلہ کرے۔فیصلے میں کہا گیا ہے کہ ٹرائل کورٹ 9 مقدمات میں ضمانت کی درخواستیں دوبارہ سنے۔ یاد رہے کہ ان در خواستوں میں سے 6 سیشن عدالت اور 3 درخواستیں انسداد دہشتگردی عدالت نے خارج کی تھیں۔