سائفر کیس،ہائیکورٹ کے حکم امتناع کے باعث سماعت ملتوی

راولپنڈی(صباح نیوز) خصوصی عدالت نے سائفر کیس میں ہائیکورٹ کے حکم امتناع کے باعث سماعت 23 نومبر تک ملتوی کردی ۔اڈیالہ جیل میںچیئرمین پی ٹی آئی اورشاہ محمودقریشی کے خلاف سائفر کیس کی سماعت خصوصی عدالت کے جج ابوالحسنات ذوالقرنین نے کی۔ چیئرمین پی ٹی آئی کے خلاف ایک مقدمہ تھانہ کھنہ اور 2 مقدمات تھانہ بہارہ کہو میں درج ہیں، تینوں تھانوں کے ایس ایچ اوزریکارڈ لے کر اڈیالہ جیل پہنچے۔چیئرمین پی ٹی آئی کے وکلا اور بشری بی بی بھی اڈیالہ جیل کے کمرہ عدالت پہنچ گئے، جبکہ چیئرمین پی ٹی آئی کی تینوں بہنیں اور شاہ محمود قریشی کی اہلیہ اور دونوں بیٹیاں بھی اڈیالہ جیل آئیں۔چیئرمین پی ٹی آئی اورشاہ محمودکیخلاف سائفر کیس کی سماعت شروع ہونے سے قبل وکلا نے چیئرمین پی ٹی آئی اور شاہ محمودقریشی سے مشاورت کی۔عدالت نے ہائیکورٹ کے حکم امتناع کے باعث سماعت 23 نومبر تک ملتوی کردی۔