جڑانوالہ، 7سالہ مغوی بچہ بازیاب، تاوان طلب کرنے والے میاں بیوی گرفتار

جڑانوالہ (آئی این پی ) پنجاب کے شہر جڑانوالہ میں تھانہ سٹی کی پولیس نے 24 گھنٹوں میں 7 سالہ بچے کے اغوا اور 60 لاکھ روپے تاوان طلب کرنے والے میاں بیوی کو گرفتار کر کے مغوی کو بازیاب کروا لیا۔ ایس پی ملک عابد حسین ظفر نے ایس ایچ او تھانہ سٹی یوسف شہزاد سپرا کے ہمراہ بتایا کہ رضا آباد کے رہائشی عمر فاروق نے 15 پر کال کر کے بتایا کہ ان کا 7 سالہ بھتیجا عدیل گھر سے ٹیوشن پڑھنے گیا مگر واپس نہیں آیا۔ پولیس حکام کے مطابق اغوا کاروں نے اہل خانہ سے ساٹھ لاکھ روپے تاوان کا مطالبہ کیا تھا، پولیس نے اغوا کا مقدمہ درج کرنے کے بعد بچے کی بازیابی کے لیے ایس ایچ او یوسف شہزاد سپرا کی سربراہی میں خصوصی ٹیم تشکیل دی گئی۔ پولیس کی ٹیم نے جدید ٹیکنالوجی کی مدد سے چوبیس گھنٹوں میں بچے کو اغوا کرنے میں ملوث میاں بیوی ستارہ عرف جٹی اور اس کے شوہر اعجاز کو گرفتار کر کے ان کے قبضے سے بچے کو بازیاب کرا لیا۔ اغوا کاروں کے بارے میں معلوم ہوا کہ وہ ساہیوال کے رہائشی ہیں، اغوا برائے تاوان میں ملوث مرکزی ملزمہ ستارہ جٹی نے دوران تفتیش اعتراف جرم کرتے ہوئے انکشاف کیا کہ اس نے اپنے شوہر کے ساتھ مل کر عدیل کو اغوا کیا اور فیصل آباد جھنگ بازار لے جا کر اعجاز کے گھر رکھا تھا۔ ایس پی ٹان ملک عابد نے مزید بتایا کہ اغوا برائے تاوان میں ملوث تیسرے ملزم اعجاز کی گرفتاری کے لیے چھاپے مارے جا رہے ہیں، اور اسے جلد گرفتار کر لیا جائے گا۔