سعودی حکومت نے عمرہ زائرین کیلئے میڈیکل انشورنس پالیسی لازمی قراردیدی

ریاض(آئی این پی) سعودی وزارت حج وعمرہ نے کہا کہ بیرون مملکت سے عمرہ ویزے پرآنے والے زائرین کے لیے میڈیکل انشورنس پالیسی حاصل کرنا ضروری ہے،وزارت حج و عمرہ کے مطابق بیرون مملکت سے عمرہ ویزے پرآنے والے زائرین کو انشورنس پالیسی سے فائدہ ہوگا،وزارت کا کہنا تھا کہ میڈیکل انشورنس پالیسی کا پریمیم عمرہ ویزے کی فیس کے ساتھ وصول کیا جائے گا، میڈیکل پالیسی تمام ہنگامی نوعیت کے طبی اور دیگر معاملات کو کور کرے گی،انشورنس پالیسی کے حوالے سے وزارت حج و عمرہ نے انٹرنیٹ پر معلومات فراہم کی ہیں، جورعایہ کے عنوان سے دیکھی جا سکتی ہیں،پالیسی کے فوائد کے حوالے سے وزارت حج وعمرہ کا کہنا ہے کہ کووِڈ 19کے علاوہ حادثات، وفات اور واپسی کے لیے فلائٹ کی تاخیر ہونے کی صورت میں پالیسی مکمل کوریج فراہم کرے گی،انشورنس پالیسی میں ایک لاکھ ریال تک کوریج فراہم کی جائے گی،عمرہ ویزا پالیسی کے حوالے سے وزارت نے اندرون مملکت کے لیے ٹول فری نمبر 800440008جب کہ بیرون مملکت سے استفسارات کے لیے 00966138129700نمبر مخصوص کیے ہیں،علاوہ ازیں وزارت حج کی ویب سائٹ سے بھی اس بارے میں معلومات حاصل کی جا سکتی ہیں۔