سیشن کورٹ واقعہ قابل مذمت ہے، کوئٹہ پرائیویٹ گن مینوں کے شکنجے میں ہے، بار ایسوسی ایشن
کوئٹہ (انتخاب نیوز) کوئٹہ بار ایسوسی ایشن نے سیشن کورٹ واقعے پر ایک ہنگامی اجلاس طلب کرلیا، جس میں صدر ملک عابد کاکڑ ایڈووکیٹ، جنرل سیکرٹری چنگیز حئی بلوچ ایڈووکیٹ، نائب صدر کوئٹہ محمد عباس کاکڑ ایڈووکیٹ، نائب صدر سریاب جہانزیب مری ایڈووکیٹ، نائب صدر کچلاک سید نصیب اللہ آغا ایڈووکیٹ، جوائنٹ سیکرٹری ملک احمد بلال کاکڑ ایڈووکیٹ، فنانس سیکرٹری عبداللہ شیرانی ایڈووکیٹ اور لائبریری سیکرٹری اسداللہ اچکزئی ایڈووکیٹ نے شرکت کی۔ کابینہ نے اپنے ایک مذمتی بیان میں کہا کہ آج سیشن کورٹ کوئٹہ کے سامنے فائرنگ کی شدید الفاظ میں مذمت کرتے ہیں، کوئٹہ اس وقت پرائیویٹ گن مینوں کے شکنجے میں ہے، جسکی وجہ سے کوئٹہ کے لوگوں میں شدید خوف و ہراس پایا جاتا ہے، حالانکہ بلوچستان ہائیکورٹ کے احکامات کے باوجود پرائیویٹ گن مینوں کی جانب سے اسلحہ کی نمائش اور فائرنگ حکومت وقت کے لئے سوالیہ نشان ہے، حکومت وقت ہائیکورٹ کے احکامات پر فوری طور پر عملدرآمد کرائے، کچہری اور سیشن کورٹ کے سامنے پرائیویٹ گن مینوں پر فوری طور پر پابندی عائد کردی جائے بصورت دیگر سخت سے سخت احتجاج کریں گے۔
