ماسکو اپنے جوہری ہتھیار بیلا روس میں نصب کریگا، دونوں ممالک کا معاہدہ ہوگیا

ماسکو (مانیٹرنگ ڈیسک ) روس کا بیلاروس کے ساتھ جوہری ہتھیار رکھنے کا معاہدہ ہوگیا، معاہدے کے تحت روس اپنے جوہری ہتھیار بیلاروس میں رکھے گا۔ روسی صدر پیوٹن نے کہا کہ بیلاروس کے ساتھ اس کی سرزمین پر ٹیکٹیکل جوہری ہتھیار رکھنے کا معاہدہ کیا ہے، امریکا نے بھی یورپی اتحادیوں کی سرزمین پر جوہری ہتھیار رکھے ہوئے ہیں، روسی اقدام سے جوہری عدم پھیلاو¿ کے معاہدوں کی خلاف ورزی نہیں ہوگی۔ روسی صدر پیوٹن نے سرکاری ٹی وی سے بات کرتے ہوئے کہا تھا کہ بیلاروس کے صدر طویل عرصے سے اپنے ملک میں ٹیکٹیکل جوہری ہتھیار رکھنے کیلئے کہتے رہے تھے، ہم نے فیصلہ کیا ہے کہ بین الاقوامی قوائد و ضوابط اور ذمہ داریوں کی خلاف ورزی کیے بغیر ہم بھی امریکا کی طرح اپنے اتحادی ملکوں میں جوہری ہتھیار رکھ سکتے ہیں۔ انہوں نے کہا کہ ہم اپنے جوہری ہتھیار بیلاروس کے حوالے نہیں کر رہے، لیکن ہم بھی بلکل وہی کر رہے ہیں جو امریکا دہائیوں سے کرتا آ رہا ہے۔