پی ڈی ایم کی گیارہ میں سے 2 جماعتوں کے علاوہ باقی کو تو میں جانتا بھی نہیں، شیخ رشید احمد

اسلام آباد:وفاقی وزیر داخلہ شیخ رشید احمد نے کہا ہے کہ مولانا فضل الرحمان کو اب کوئی عہدہ نہیں ملنے والا،پی ڈی ایم کی گیارہ میں سے 2 جماعتوں کے علاوہ باقی کو تو میں جانتا بھی نہیں، پاکستان کا سب سے مشکل کام ووٹ مانگنا ہے، پیراشوٹ سے اتر نے اور وراثت میں سیاست ملنے والوں کو مشکل کا پتا نہیں ہے۔بدھ کونجی ٹی وی سے گفتگو کرتے ہوئے وزیر داخلہ شیخ رشید نے کہا کہ مریم نواز اور مولانا فضل الرحمان حصہ لیں یا نہ لیں سینیٹ الیکشن تو ہوکر رہیں گے، اصل مسئلہ مولانا کا ہے صف ماتم ان کے ہاں بچھی ہے، آج وہ مریم نواز سے رابطے میں ہوں گے، پی ڈی ایم کی گیارہ میں سے 2 جماعتوں کے علاوہ باقی کو تو میں جانتا بھی نہیں۔انہوں نے کہا کہ ن لیگ کے دو رہنما استعفے دینے سے انکاری ہوگئے، انہوں نے اسپیکر اسد قیصر کو کہہ دیا کہ استعفے نہیں دیں گے، یہ کل اجلاس میں نہیں گئے، صرف تحریری استعفی ہی قبول کیا جاتا ہے۔شیخ رشید نے کہا کہ سنا ہے کئی لوگوں نے دستخط نہیں کیے اور استعفے تحریری لکھ کر نہیں دئیے ہیں، وزیراعظم عمران خان نے کہہ دیا ہے جو استعفیٰ دے اسپیکر اس کو قبول کریں۔وزیر داخلہ نے کہا کہ پاکستان کا سب سے مشکل کام ووٹ مانگنا ہے، پیراشوٹ سے اتر نے اور وراثت میں سیاست ملنے والوں کو مشکل کا پتا نہیں ہے۔