اوگرا نے غیر معیاری ایل پی جی سلنڈرز کی خریدوفروخت پر پابندی عائد کر دی
اسلام آباد(صباح نیوز)اوگرا نے غیر معیاری ایل پی جی سلنڈرز کی خرید و فروخت پر پابندی عائد کر دی جس کا نوٹیفکیشن بھی جاری کر دیا۔نوٹیفکیشن کے مطابق غیر مجاز ڈسٹری بیوٹرز کو ایل پی جی کی فروخت کرنے پر مارکیٹنگ کمپنیوں کے خلاف کارروائی ہو گی۔غیر معیاری سلنڈرز میں گیس بیچنے والوں اور ایل پی جی کی مارکیٹنگ کمپنیوں کے خلاف کارروائی ہو گی۔ اس ضمن میں ملک بھر میں 313 ایل پی جی مارکیٹنگ اور 19 سلنڈر بنانے والی کمپنیوں کو نوٹس جاری کئے گئے ۔اوگرا نے غیر معیاری سلنڈرز میں ایل پی جی کی ری فلنگ غیر قانونی اور خطرناک قرار دے دی۔نوٹیفکیشن کے مطابق ایل پی جی کے کاروبار کے نئے ضابطہ اخلاق بنا دیئے گئے، ایل پی جی کا کاروبار صرف مجاز ڈسٹری بیوٹر ہی کر سکیں گے۔اوگرا حکام کا اس ضمن میں کہا کہ غیر معیاری ایل پی جی سلنڈرز پھٹنے کے حادثات بہت بڑھ چکے تھے، اس حوالے سے مانیٹرنگ کے تمام تر اختیارات ڈی سی اور اے سی کے پاس ہوں گے۔
