قائمہ کمیٹی برائے داخلہ کا پی ٹی آئی لیڈرشپ کے گھروں پر چھاپوں کا نوٹس

اسلام آباد (انتخاب نیوز) سینیٹ کی قائمہ کمیٹی برائے داخلہ نے پاکستان تحریک انصاف لانگ مارچ پر طاقت کے استعمال کا نوٹس لے لیا۔ اعلامیے کے مطابق قائمہ کمیٹی نے پی ٹی آئی لیڈرشپ کے گھروں پر چھاپوں کا بھی نوٹس لیا ہے، کارکنوں اور مارچ کے شرکاء کی گرفتاریوں، قیادت کے خلاف مقدمات کے اندراج کا بھی نوٹس لیا گیا۔ سینیٹ کی قائمہ کمیٹی کا کہنا ہے کہ مارچ میں شریک کارکنان، پْرامن مظاہرین کو احتجاج کے بنیادی حق سے روکا گیا۔ کمیٹی نے سیکرٹری داخلہ، چیف سیکرٹری پنجاب، سیکرٹری داخلہ اور آئی جی پنجاب کو نوٹس جاری کردیا۔ قائمہ کمیٹی داخلہ نے آئی جی اسلام آباد، ڈی آئی جی آپریشن اسلام آباد کو بھی نوٹس جاری کردیا، ڈی آئی جی آپریشنز پنجاب، چیف کمشنر اور ڈپٹی کمشنر اسلام آباد کو بھی نوٹس جاری کرتے ہوئے وضاحت طلب کرلی ہے۔