پی ڈی ایم تحریک فیصلہ کن راؤنڈ میں داخل ہوچکی ہے،مولاناحیدری

کراچی (پ ر) جمعیت علماء اسلام کے مرکزی سیکرٹری جنرل سینیٹر اور پی ڈی ایم کے مرکزی رہنما سینیٹر مولانا عبدالغفور حیدری نے کہا ہے کہ فلسطین انبیاء کی مقدس سرزمین اور امت مسلمہ کے عقیدتوں کا مرکز ہے، 21 جنوری کو اہلیان کراچی تاریخ ساز اسرائیل نامنظور مارچ اور جلسہ عام کے ذریعے فلسطینی مسلمانوں سے یکجہتی کا مثالی اظہار کریں گے،ان خیالات کا اظہار انہوں نے کراچی میں جے یو آئی سندھ کے سیکرٹری جنرل علامہ راشد محمود سومرو سے ان کے برادرم نسبتی کے انتقال پر تعزیت کے دوران گفتگو کرتے ہوئے کیا۔اس موقع پر صوبائی نائب امیر مولانا عبد الکریم عابد، ڈاکٹر نصیر الدین سواتی، مولانا محمد غیاث، سمیع الحق سواتی، مولانا احسان اللہ ٹکروی، مولانا حسن لانگا، مولانا نورالحق، شرف الدین اندھڑ ودیگر بھی موجود تھے۔ سینیٹر مولانا عبدالغفور حیدری، اور علامہ راشد محمود سومرو نے جماعتی ذمہ داران سے گفتگو کرتے ہوئے کہا کہ نااہل اور ناجائز حکمران پی ڈی ایم کی تحریک سے حواس باختہ ہوکر اوچھے ہتکھنڈوں پر اتر آئے ہیں، نیب کو گھر کی لونڈی بناکر حکومت مخالف رہنماؤں کیخلاف استعمال کیا جارہا ہے، نیب کی جانبداری زبان زد عام ہوچکی ہے نیب اپنی تمام توانائیاں اپوزیشن لیڈر شپ کی کردار کشی اور تضحیک کیلئے بروئے کار لارہا ہے جو کہ انتہائی شرمناک عمل ہے، قائد جمعیت مولانا فضل الرحمن کی حالیہ کردار کشی مہم نیب کی اسی سطحی ذہنیت کی عکاسی ہے، انہوں نے جمعیت علماء اسلام کراچی کے ذمہ داران سے کہا کہ وہ 21 جنوری کو اسرائیل نامنظور مارچ اور جلسہ عام کی کامیابی کیلئے عوامی مہم کو تیز کریں، گلی گلی، محلہ محلہ جاکر اسرائیل سے پینگیں بڑھانے والوں کو بینقاب کریں، سلیکٹڈ حکمران کشمیریوں کو فراموش کرنے کے بعد فلسطین کا قضیہ بھی زمین بوس کرنے کی سازشوں میں مصروف عمل ہیں۔ لیکن مولانا فضل الرحمن اور جمعیت علماء اسلام نے جس طرح حکمرانوں کی کشمیر فروشی کا پردہ چاک کیا ہم قبلہ اول کی حرمت کیلئے پاکستانی عوام کو بیدار کرکے فلسطینی مسلمانوں سے یکجہتی کا اظہار کریں گے۔انہوں نے کہا کہ جمعیت علماء اسلام کی صفوں پر بھرپور یکجہتی ہے، کارکنان کا قیادت پر مسلسل اور غیر متزلزل اعتماد ہی جمعیت کی طاقت ہے جس سے مخالفین خائف ہیں۔ مولانا عبدالغفور حیدری نے واشگاف الفاظ میں حکومتی صفوں کو متنبہ کرتے ہوئے کہا کہ ان کی سازشیں ہماری تحریک کا رخ اور کارکن کا نظریہ کسی صورت تبدیل نہیں کرسکتے، مولانا فضل الرحمن کی قیادت میں پوری اپوزیشن متحد اور پی ڈی ایم تحریک فیصلہ کن راؤنڈ میں داخل ہوچکی ہے، ہم بہت جلد ان نااہل اور ناجائز حکمرانوں سے قوم کو چھٹکارا دلا دیں گے