عوامی خدمت کا سفر شروع ہو چکا ہے، میر ضیا اللہ لانگو

کوئٹہ: صوبائی وزیر داخلہ میر ضیا اللہ لانگو نے کہا ہے کہ بلوچستان عوامی پارٹی کا ایجنڈا صرف عوام کی خدمت ہے۔حکومت عوام کو بنیادی سہولتوں کی فراہمی پر توجہ مرکوز کئے ہوئے ہے۔ عوامی خدمت کا سفر شروع ہو چکا ہے، اب رکے گا نہیں۔ عوام کی خدمت کی راہ میں کوئی رکاوٹ قبول نہیں۔ وزیر داخلہ نے اپنے ایک بیان میں کہا کہ بلوچستان عوامی پارٹی کی حکومت نے عام آدمی کی حالت بہتر بنانے کے لئے بے مثال اقدامات کئے ہیں۔ ہماری حکومت کی پالیسیوں کا مرکز و محور عام آدمی ہے۔ وزیر داخلہ نے کہا کہ غریب کی فلاح و بہبود کا ایجنڈا لیکر برسراقتدار آئے ہیں اور عام آدمی کی حالت کو بدلیں گے۔امن وامان، تعلیم، اور صحت پر خصوصی توجہ دے رہے ہیں کیونکہ یہ عوام کی بنیادی ضرورت ہے۔ عوام کی ترقی و خوشحالی کے روڈ میپ پر تیزی سے عملدرآمد کیا جا رہا ہے۔ عوام کے مسائل حل کرنے کی کمٹمنٹ پوری کریں گے۔ انہوں نے کہا کہ تبدیلی کی راہ میں ہمیشہ رکاوٹیں آتی ہیں لیکن ہمت نہیں ہاریں گے۔ وسائل کم اور مسائل زیادہ ہیں لیکن ہمارا عزم ان سے بلند ہے۔انہوں نے کہا کہ ہم باتیں نہیں کام کر رہے ہیں۔ لوٹ مار کا دور گزر چکا ہے،قومی وسائل عوام کی امانت ہیں۔، نئی سوچ اور نئے جذبوں سے عبارت ہے۔ صوبے کے عوام کی فلاح وبہبودکیلئے ہرممکن حد تک جائیں گے۔