منی بجٹ کے ٹیکسز آئندہ مالی سال بھی برقرار رکھے جائیں، آئی ایم ایف کا پاکستان سے مطالبہ

اسلام آباد (این این آئی) آئی ایم ایف کے مطالبے پر منی بجٹ کے ٹیکسز آئندہ مالی سال بھی برقرار رکھنے کا فیصلہ کرلیا گیا،ٹیکسز برقرار رکھنے سے 5 سو ارب روپے کی اضافی آمدنی ہوگی،ایف بی آر کو ٹیکس فائلرز کی تعداد بڑھانے کا بھی ہدف دے دیا گیا ہے۔ وزارت خزانہ کے ذرائع کے مطابق فروی میں منی بجٹ کے ذریعے لائے گئے میں 177 ارب روپے کے ٹیکسز آئندہ بجٹ میں بھی برقرار رہیں گے جس سے حکومت کو 5 سو ارب روپے کی اضافی آمدنی ہوگی، سیلز ٹیکس کی شرح کو 18 فیصد اور لگڑری اشیاءپر 25 فیصد سیلز ٹیکس برقرار رہے گا۔ ذرائع کے مطابق سرکاری ملازمین کی تنخواہوں میں 15 سے 20 فیصد اضافے کی تجویز ہے، بجٹ 2023.24 میں نان فائلرز کی کڑی نگرانی کرنے کا بھی فیصلہ کیا گیا ہے، نان فائلرز سے لین دین کرنے والوں کی بھی سخت ماںیٹرنگ کی جائے گی، ٹیکس چوروں کے خلاف آرٹیفیشل انٹیلی جنس استعمال کی جائے گی، ٹیکس نظام کو ڈیجٹلائز کر کے ٹیکس آمدن بڑھائی جائے گی۔ ایف بی آر کو ٹیکس فائلرز کی تعداد بڑھانے کا بھی ہدف دیا گیا ہے۔