تربت میں جاری دھرنا لانگ مارچ کی صورت میں کوئٹہ روانہ ہوگا، بلوچ یکجہتی کمیٹی
کیچ (انتخاب نیوز) بلوچ یکجہتی کمیٹی کی جانب سے بلوچ نسل کشی کیخلاف بالاچ اور لاپتہ افراد کے لواحقین کے ہمراہ احتجاجی تحریک بروز بدھ کیچ سے لانگ مارچ کی شکل میں نکل کر پنجگور کی طرف روانہ ہوگی۔ ہم پہلے دن سے کہہ رہے ہیں کہ اگر ریاست ہمارے مطالبات پر سنجیدگی سے غور نہیں کرتی اور اپنی پالیسیوں میں تبدیلی لانے کیلئے تیار نہیں تو بالاچ اور دیگر لاپتہ افراد کی قربانیوں سے اٹھنے والی یہ تحریک بلوچستان کے کونے کونے تک پہنچے گی۔ کیونکہ ہم نہیں چاہتے کہ دیگر لاپتہ افراد کی ہمیں گولیوں سے چھلنی لاشیں فیک انکاﺅنٹر میں ملیں۔ بروز بدھ پنجگور کے باشعور عوام اور ریاستی ظلم کے شکار بلوچ قوم سے اپیل کی جاتی ہے کہ وہ لانگ مارچ کو ویلکم کرنے کے ساتھ ساتھ جبری گمشدگی کے شکار افراد اپنے کیسز رجسٹر کرائیں جبکہ سیاسی و ظلم کے شکار افراد لانگ مارچ کی شکل میں جاری تحریک کا حصہ بنیں۔
