بنگلا دیش میں مظاہرے، حکومت کا جماعت اسلامی پر پابندی کا فیصلہ

ڈھاکا (مانیٹرنگ ڈیسک) بنگلادیش میں کوٹہ سسٹم کیخلاف ہونے والے پر تشدد احتجاجی مظاہروں کے بعد حکومت نے جماعت اسلامی بنگلادیش اور طلبہ تنظیم اسلامی چھاترو شبر پر پابندی کا فیصلہ کرلیا۔ مقامی میڈیا کے مطابق ان جماعتوں پر پابندی کا فیصلہ 14 جماعتی حکومتی اتحاد کے اجلاس میں ہوا۔ بنگلادیشی وزیر قانون کے مطابق پابندی کے فیصلے کو حتمی شکل دینے کے لیے آج وزیر داخلہ سے مشاورت ہوگی جس کے بعد کل ایک ایگزیکٹو آرڈر کے ذریعے جماعت اسلامی بنگلا دیش اور اسلامی چھترو شبر پر پابندی عائد کردی جائے گی۔ بنگلا دیشی میڈیا کے مطابق بنگلادیشی الیکشن کمیشن 2018 میں جماعت اسلامی بنگلادیش کی رجسٹریشن منسوخ کرچکا ہے۔ جماعت اسلامی بنگلادیش کے رہنماﺅں نے حکومتی فیصلے کو غیر قانونی، غیر آئینی اور ماورائے عدالت قدم قرار دیا ہے۔