شاہ زیب رند کراٹے کومبیٹ ورلڈ چیمپئن بن گئے

بلوچستان کے مکسڈ مارشل آرٹس (ایم ایم اے) فائٹر شاہزیب رند نے تاریخ رقم کردی اور کومبیٹ ورلڈ چیمپئن بن گئے۔سنگاپور میں شاہ زیب رند نے برازیل کے فائٹر برونو روبرٹو ڈی ایسز کو شکست دی۔شاہ زیب رند نے تیسرے راؤنڈ میں ٹیکنیکل ناک آؤٹ کے ذریعے برازیل کے فائٹر کو ہرایا۔اپنی جیت پر تبصرہ کرتے ہوئے بلوچستان کے 26 سالہ نوجوان نے ’ایکس‘ پر چیمپئن شپ بیلٹ کے ہمراہ تصویر پوسٹ کرتے ہوئے لکھا کہ ’خواب سچ ہوگیا۔‘اپنی انسٹاگرام پوسٹ میں ان کا کہنا تھا کہ ’یہ ایک طویل اور چیلنجنگ سفر رہا ہے، لیکن ہم نے اسے کر دکھایا۔‘انہوں نے اس مقام تک پہنچنے میں مدد کرنے کے لیے کئی لوگوں کا شکریہ ادا کیا، جن میں ان کے کوچ، منیجر، خاندان اور ٹیم شامل ہے۔شاہ زیب رند اپنی اگلی فائٹ ورلڈ کراٹے کومبیٹ لائٹ ویٹ چیمپئن لوئز وکٹر روچا کے ساتھ لڑیں گے۔مکسڈ مارشل آرٹس ایک مکمل رابطے والا کومبیٹ کھیل ہے جس میں مارنا، گراپلنگ اور زمینی لڑائی شامل ہے۔ ایم ایم اے دنیا بھر سے مختلف کومبیٹ کھیلوں کی تکنیکوں کو شامل کرتا ہے۔