جو بائیڈن ڈیل کی شرائط کا احترام کریں، افغان طالبان

واشنگٹن:افغان طالبان نے نومنتخب امریکی صدر جوبائیڈن پر زور دیا ہے کہ وہ ڈیل کی شرائط کا احترام کریں،غیرملکی خبررساں ادارے کے مطابق منگل کی صبح افغان طالبان کا ایک بیان سامنے آیا، جس میں انہوں نے امریکا کے منتخب صدر جو بائیڈن پر زور دیا ہے کہ وہ دوحہ میں اس سال طے پانے والی ڈیل کی شرائط پر عمل پیرا رہیں۔ طالبان کا زور افغانستان سے امریکی افواج کے مئی تک مکمل انخلا سے متعلق شرط پر تھا۔ افغان طالبان ان دنوں کابل حکومت کے ساتھ مذاکراتی عمل میں شامل ہیں البتہ ملک میں تشدد کی تازہ لہر بھی جاری ہے۔ رواں سال 29 فروری کو دوحہ میں امریکا اور طالبان کے مابین ڈیل طے پائی تھی، جس میں امریکا نے مئی تک تمام فوجی دستوں کے انخلا اور طالبان نے پر تشدد کارروائیاں ترک کرنے کی یقین دہانی کرائی تھی۔