طالبان کی واپسی کے بعد درجنوں سابق سرکاری ملازمین ہلاک کیے گئے، اقوام متحدہ

کابل :افغانستان پر پچھلے اگست سے طالبان کے قبضے کے بعد ایک سو سے زائد سابق سرکاری اہلکاروں کو ماورائے عدالت قتل کیا گیا ہے۔غیرملکی خبررساں ادارے کے مطابق اس بات کا انکشاف اقوام متحدہ کی ایک داخلی رپورٹ میں کیا گیا ہے۔ اس رپورٹ کے مطابق دو تہائی سے زیادہ ہلاکتوں کی ذمہ داری مبینہ طور پر طالبان یا پھر ان سے وابستہ دیگر گروہوں پر عائد ہوتی ہے۔ پچاس سے زائد ہلاکتوں کا شبہ عسکریت پسند تنظیم داعش خراسان کے جنگجوں پر بھی ہے۔ رپورٹ کے مطابق حالیہ مہینوں میں انسانی حقوق کے کارکنوں اور صحافیوں کو حملوں، گرفتاریوں، دھمکیوں اور ہلاکتوں کا سامنا ہے۔