پاکستان بحریہ نے گوادر کے قریب ڈوبنے والی بھارتی کشتی کے عملے کے 9 افراد کو بچا لیا
گوادر (انتخاب نیوز) بحریہ کا گوادر کے قریب کھلے سمندر میں ڈوبنے والی بھارتی کشتی جمنا ساگر کیلئے سرچ اینڈ ریسکیو آپریشن۔ بھارتی کشتی جمنا ساگر 9 اگست کو عملے کے دس افراد کے ہمراہ بحیرہ عرب میں گوادر کے قریب ڈوب گئی تھی۔ اطلاع ملنے پر پاکستان میری ٹائم انفارمیشن سینٹر نے قریبی بحری جہاز MT KRUIBEKE کو ہدایات دیں کہ ڈوبنے والے بھارتی عملے کی امداد کی جائے۔ بحری جہاز نے عملے کے 9 افراد کو زندہ بچالیا اور دبئی کی بندرگاہ کی طرف اپنا سفر جاری رکھا، جہاں وہ کشتی کے عملے کو اتارے گا۔ اسی دوران بحریہ کا ایک جہاز دو ہیلی کاپٹرز کے ہمراہ کھلے سمندر میں پہنچا اور ڈوبنے والے ایک بھارتی شہری کی لاش کو تلاش کیا۔ بحریہ کے عملے نے لاش کو مزید کارروائی کے لیے پاکستان میری ٹائم سیکورٹی ایجنسی کے حوالے کیا۔ بحریہ کا یہ کامیاب سرچ اور ریسکیو آپریشن سمندر میں انسانی زندگی کے تحفظ کے عزم کا مظہر ہے۔ بحریہ اپنے پانیوں کے اندر اور باہر کسی بھی ہنگامی صورتحال میں امداد کے لیے ہمیشہ پیش پیش رہی ہے۔
