بلوچستان میں حوالہ ہنڈی اور بجلی چوری کیخلاف کارروائیاں، 20 ملزمان گرفتار

کوئٹہ (یو این اے) کوئٹہ میں ایف آئی اے نے صوبے میں حوالہ ہنڈی اور بجلی چوری کے خلاف کارروائی کے دوران 20 ملزمان کو گرفتار کیا، 54 مقدمات درج کرلیے، 3 کروڑ کی بجلی چوری پکڑی گئی، 2 کروڑ 91 لاکھ روپے ریکور کرالیے گئے۔ ایف آئی اے بلوچستان زون کی جانب سے حوالہ ہنڈی، جعلی ادویات اور بجلی چوری میں ملوث عناصر کے خلاف کریک ڈان جاری ہے، ڈیڑھ ماہ کے دوران ایف آئی اے بلوچستان زون نے بجلی چوری میں ملوث عناصر کے خلاف 806 چھاپہ مار کارروائیاں کیں۔ایف آئی اے کے مطابق چھاپوں کے نتیجے میں 67 انکوائریاں اور 54 مقدمات درج کرکے 20 ملزمان کو گرفتار کرلیا گیا، مجموعی طور پر 3 کروڑ روپے سے زائد کی بجلی چوری پکڑی گئی جس کے بعد ملزمان سے 2 کروڑ 91 لاکھ روپے ریکور کرلیے گئے۔ڈیڑھ ماہ کے دوران اووربلنگ کے حوالے سے 207 سرکاری اداروں کے میٹرز چیک کیے گئے، مجموعی طور پر دو میٹرز پر اووربلنگ کا انکشاف ہوا جس پر انکوائریاں درج کرلی گئیں۔