ٹرمپ کو سزا پر انتخابی کشیدگی میں اضافہ، حامیوں کے مظاہرے
واشنگٹن(این این آئی)امریکی انتخابی مہم کے دوران ری پبلکن اور ڈیموکریٹ ووٹرز کے درمیان کشیدگی بڑھتی جارہی ہے۔ سابق صدر ڈونلڈ ٹرمپ کو منہ بند رکھنے کی رشوت کے کیس میں سزا سنائے جانے پر ری پبلکن پارٹی کے حامی مشتعل ہیں۔غیرملکی خبررساں ادارے کے مطابق متعدد مقامات پر احتجاج کے دوران ری پبلکن پارٹی کے حامیوں نے امریکا کے پرچم کی توہین بھی کی ہے۔ احتجاجی مظاہروں کے دوران امریکی پرچم کو الٹا لہرایا گیا۔ صدر جو بائیڈن نے قومی پرچم کی توہین پر ری پبلکن پارٹی کے حامیوں کو شدید تنقید کا نشانہ بنایا ہے۔ ان کا کہنا تھا کہ قومی پرچم کی توہین کسی بھی طور برداشت نہیں کی جاسکتی۔ڈونلڈ ٹرمپ پہلے سابق امریکی صدر ہیں جنہیں کسی کیس میں سزا سنائی گئی ہے۔ اب صدارتی انتخاب میں شرکت کے لیے ان کی اہلیت پر بھی سوال اٹھ رہا ہے۔ ڈیموکریٹس نے عدالتی فیصلے کو اچھالنا شروع کردیا ہے، ملک بھر میں ووٹرز کو باور کرایا جارہا ہے کہ ایک سزا یافتہ شخص ان سے ووٹ چاہتا ہے۔
