افغانستان کا ازبکستان کے ساتھ ڈھائی ارب ڈالر کا تجارتی اور سرمایہ کاری معاہدہ

کابل (صباح نیوز) امارات اسلامی افغانستان نے ہمسایہ ملک ازبکستان کے ساتھ ڈھائی ارب ڈالر کا تجارتی اور سرمایہ کاری کا معاہدہ کیا ہے۔ وی او اے کے مطابق یہ معاہدہ ازبکستان کے وزیراعظم کے کابل دورے کے دوران ہفتے کو طے پایا۔دورے کے دوران ازبک وزیرِ اعظم کے ہمراہ سرمایہ کاری، صنعت اور تجارت کے وزرا اور دیگر اعلی حکام بھی موجود تھے۔ازبک وزیرِ اعظم عبداللہ اریپوف اور افغان حکومت کے نائب وزیرِ اعظم ملا عبدالغنی برادر تجارتی معاہدے کے موقع پر موجود تھے۔ملا برادر کے دفتر کی جانب سے جاری کردہ بیان میں کہا گیا ہے کہ 1.4 ارب ڈالر مالیت کے 12 سرمایہ کاری جب کہ 1.1 ارب ڈالرز کے 23 تجارتی معاہدوں پر دستخط کیے گئے ہیں۔دستاویزات کے مطابق ان میں زراعت، توانائی، انفراسٹرکچر اور مینوفیکچرنگ کے شعبے شامل ہیں۔اس موقع پر ملا عبدالغنی برادر کا کہنا تھا کہ معاہدوں سے دونوں ملکوں کے تعلقات میں بہتری کے ساتھ ساتھ تعاون کی مزید راہیں کھلیں گی۔ازبک وزیرِ اعظم کے بقول دونوں ممالک تجارتی حجم تین ارب ڈالرز تک پہنچانے کے لیے کوشاں ہیں۔