مخصوص لوگ بجلی ریلیف پر پروپیگنڈا کررہے ہیں، مریم اورنگزیب

لاہور(صباح نیوز) پنجاب کی سینئر وزیر مریم اورنگزیب نے کہا ہے کہ مخصوص لوگ بجلی ریلیف پر پروپیگنڈا کررہے ہیں۔لاہور میں نیوز کانفرنس کرتے ہوئے انہوںنے کہا کہ بجلی صارفین کو 500 یونٹ تک بڑا ریلیف کا اعلان کیا گیا، پنجاب کے عوام کو بجلی کے بلز پر ریلیف دیا گیا، عوام کے لئے آسانیاں پیدا کرنامسلم لیگ (ن)کی سیاست رہی ہے، مشکل ترین حالات میں بھی عوام کو ریلیف دینا مسلم لیگ (ن)کا طرہ امتیاز ہے،بجلی صارفین کو ریلیف دینے کے لئے پنجاب کے بجٹ سے 45 ارب روپے دیئے جارہے ہیں۔پاکستان تحریک انصاف پر تنقید کرتے ہوئے انہوںنے کہا کہ 4 سال نالائقی،کرپشن کا بازار گرم رہا، انہیں عوام کو ریلیف برداشت نہیں ، انہوں نے عوام کودینے ریلیف پر پروپیگنڈا شروع کردیا، پروپیگنڈا اور جھوٹ بولنے والوں کوعوام کا ریلیف برداشت نہیں ۔مریم اورنگزیب نے کہا کہ پی ٹی آئی نے 4 سال ملک کا نقصان کیا، ہم نے 4 ماہ عوام کو ریلیف دیا، کچھ عناصر کا کام فقط عوام میں مایوسی اور انتشار پھیلانا ہے، یہ 4 سال کا حساب دیتے نہیں مگر ہم سے 4 ماہ کا حساب مانگ رہے ہیں، ملکی معیشت تباہ اور مہنگائی کرنے والوں کو شرم آنی چاہیے، مسلم لیگ(ن)نے ملک کو دیوالیہ ہونے سے بچایا، مشکل حالات میں عوام کو ریلیف دینے کی سوچ صرف نواز، شہباز شریف کی ہے۔سینئر صوبائی وزیر نے کہا کہ 201 سے 500 یونٹ تک بجلی بلوں میں ریلیف پنجاب حکومت دے گی، ہم پنجاب کے عوام کے لئے سب سے بڑی سولر سکیم بھی لے کر آرہے ہیں، عوام کو ریلیف دینے میں صوبوں کو وفاق کا ہاتھ بٹاناچاہیے، اپنے اخراجات میں کمی کرکے ہم نے عوام کو بجلی بلوں میں ریلیف دیا۔انہوں نے کہا مسلم لیگ (ن)نے اپنے ہر دورحکومت میں ملک کو مشکل سے نکالا، دیکھنا ہوگا کہ کون سی جماعت نے 4 ماہ میں ملکی ترقی کا سفر شروع کردیا، ہم چاہتے ہیں کہ پنجاب کی طرح دیگر صوبوں میں بھی ریلیف دیا جائے۔انہو ں نے کہا کہ حکومتی اقدامات کی بدولت مہنگائی کی شرح میں نمایاں کمی آئی، نوازشریف عوام کو ریلیف دینے کے لئے ہمیشہ فعال رہے ہیں ، یہ پروپیگنڈا صوبوں کے درمیان اختلافات پیدا کرنے کی کوشش ہے۔