جسٹس قاضی فائز عیسیٰ اور اہل خانہ کے خلاف تمام کارروائی فوری ختم کی جائے، پاکستان بار کونسل

اسلام آباد:پاکستان بار کونسل نے کہا ہے کہ حکومت سیاسی مخالفین کو انتقام کا نشانہ بنانا بند کر دے، تمام اداروں کو اپنی حدود میں رہ کر فرائض سرانجام دینے چاہئیں۔بار کونسل کے اجلاس کی صدارت وائس چیئرمین عابد ساقی نے کی، جس میں ایگزیکٹو کمیٹی کے چیئرمین اعظم نذیر تارڑ اور کونسل ارکان نے بھی شرکت کی۔اجلاس میں پاکستان بار کونسل نے کہا کہ ایگزیکٹو اتھارٹی عدلیہ کی آزادی کو سلب نہ کرے، جسٹس قاضی فائز عیسیٰ اور اْن کے اہل خانہ کے خلاف تمام کارروائی فوری ختم کی جائے۔