ایران، سیستان و بلوچستان میں 6 مشتبہ افراد گرفتار

تہران (مانیٹرنگ ڈیسک) ایران کے انٹیلیجنس اہلکاروں نے سیستان و بلوچستان میں بیرونی جاسوسی سروسز سے وابستہ مشتبہ افراد کی دو ٹیموں کو دبوچا ہے۔ رپورٹ کے مطابق 6 مسلح افراد کو سیستان و بلوچستان میں گرفتار کیا گیا جو اس صوبے میں بنیادی ڈھانچوں کے پروجیکٹ میں کام کرنے والے کچھ غیر ملکی ملازمین کے قتل کا ارادہ رکھتے تھے۔ اس اقدام سے ان مشتبہ افراد کی پشت پناہی کرنے والی ٹیم کا بھی بھانڈا پھوڑ دیا گیا۔ ایران کی انفارمیشن منسٹری کے بیان میں آیا ہے کہ انٹیلیجنس شعبے کے اہلکار عوام کو یقین دلاتے ہیں کہ انکی سیکورٹی کے لئے وہ اپنی جان دینے کو بھی تیار ہیں اور غیر ملکی جاسوسی سرویسز کو انتباہ دیتے ہیں کہ انکے کسی بھی مشتبہ افراد کے اس اقدام کا دندان شکن جواب دیں گے۔ دوسری جانب مغربی آذربائیجان کے شعبہ انفارمیشن کے اعلیٰ عہدیدار نے بھی اس صوبے میں اسرائیل کے ایک جاسوس نٹ ورک کے تباہ ہونے کی خبر دی ہے۔