مارگلہ جنگل میں آگ لگانے کے حوالے سے ٹک ٹاکر خاتون ڈولی کی وضاحت

اسلام آباد (انتخاب نیوز) مارگلہ پہاڑیوں اور جنگلات میں مبینہ طور پر آگ لگا کر شہرت کے لیے ٹک ٹاک ویڈیو بنانے والی خاتون ٹک ٹاکر حمیرا اصغر المعروف ڈولی آفیشل نے سوشل میڈیا پر سخت ردعمل کے ساتھ ساتھ اپنے خلاف قانونی کارروائی کے آغاز کے بعد ایک وضاحتی بیان جاری کرتے ہوئے کہا ہے کہ لوگ ‘حقیقت’ سے واقف نہیں ہیں۔ خاتون ٹک ٹاکر کی مختصر ٹک ٹاک ویڈیو گزشتہ دنوں سماجی رابطے کی ویب سائٹ پر وائرل ہوئی تھی، جس پر انہیں سخت تنقید کا نشانہ بنایا گیا تھا۔ مختصر ویڈیو میں ٹک ٹاکر کو ’پسوڑی‘ گانے پر آگ کے سامنے سے گزرتے ہوئے دیکھا جاسکتا تھا۔ مذکورہ ویڈیو مبینہ طور پر مارگلہ پہاڑیوں کے سلسلے میں شوٹ کی گئی تھی جہاں موجود درختوں اور جھاڑیوں کو آگ بھی لگائی گئی۔ آج اپنے ایک معاون کی جانب سے جاری کردہ وضاحتی ویڈیو بیان میں حمیرا اصغر المعروف ڈولی آفیشل نے کہا کہ ویڈیو میں نظر آنے والی آگ انہوں نے نہیں لگائی جبکہ ویڈیو بنانے میں کوئی نقصان نہیں ہے۔ ٹک ٹاک پر الزام لگایا گیا تھا کہ انہوں نے اپنی ویڈیو پر ویوز اور صارفین کا فیڈ بیک حاصل کرنے کے لیے آگ لگائی۔