لسبیلہ میں بارشوں اور سیلابی ریلوں سے 90 فیصد انفراسٹرکچر تباہ، فصلیں تباہ

اوتھل (انتخاب نیوز) لسبیلہ میں حالیہ شدید بارشوں اور اس کے نتیجے میں آنے والے سیلابی ریلوں نے جہاں گوٹھوں کے گوٹھ میدانوں میں تبدیل کردیئے۔ وہاں وزیراعظم کے دورہ لسبیلہ کی منسوخی سے سیلاب زدگان کو مایوسی ہوئی حب برج سمیت جہاں اوتھل، بیلہ، لاکھڑا تحصیلوں کا تقریباً 90 فیصد انفرااسٹرکچر تباہ ہوگیا اور زمینداروں کی کروڑوں روپے کی کھڑی فصلیں تباہ ہوگئیں۔لوگوں کا کاروبار زندگی ٹھپ ہوکر رہ گیا۔جس میں رابطہ سڑکیں، پل، دیہی علاقوں کے سکولز، رورل ہیلتھ سینٹرز شامل ہیں۔تاحال کئی لوگ ابھی تک امداد کے منتظر ہیں۔ حالیہ آنیوالے تباہ کن سیلاب کے بعد متاثرہ انفرا اسٹرکچر کی بحالی کے حوالے سے اقدامات انتہائی سست روی کا شکار ہیں وفاقی و صوبائی حکومتوں کی طرف سے لسبیلہ کو آفت زدہ قرار دینے کے بھی ثمرات نظر نہیں آئے۔ کے الیکٹرک نے بھی زیادہ بل بھیج دیئے۔حکومت کے بلند بانگ دعوے اور مطلوبہ وسائل کی فراہمی میں کسی قسم کوتاہی نہ کرنے کا اعلانات بھی کئے گئے تھے۔ مگر تاحال عملاً اس سلسلے میں کچھ نہیں کیا گیا۔ جس کی وجہ سے لسبیلہ کے طول و عرض میں تباہ شدہ انفراسٹرکچر جوں کے توں پڑے ہیں۔