ای او بی آئی کے پنشنرز سے کٹوتی ظلم ہے، معاملہ پارلیمنٹ میں اٹھایا جائے، نیشنل پارٹی

تربت: نیشنل پارٹی کے مرکزی سیکریٹری جنرل جان محمد بلیدی نے صنعتی مزروروں کے بڑھاپے کی پنشن 8500 روپے سے کم کرکے 6500 روپے مقرر کرنے کی شدیدالفاظ میں مذمت کرتے ہوئے کہاہے کہ کروناوائرس کی وباکی وجہ سے سب سے زیادہ متاثر مزدورطبقہ ہواہے جبکہ اولڈایج بینی فٹس انسٹیٹیوشن(ای او بی آئی) کے پنشنرجوبوڑھے بھی ہیں اور بیمار بھی ان کے ساتھ اس کڑے وقت میں وفاقی حکومت کی طرف سے کیاگیا یہ ظالمانہ اقدام حکومت کی مزدور دشمنی کامنہ بولتاثبوت ہے انہوں نے کہا کہ ای او بی آئی کاادارہ کسی کی جاگیرنہیں ہے اس ادارے کا فنڈ صنعت کاروں اورمزدوروں کے اشتراک سے جمع ہوتاہے اوراس کا انتظام چلانے کے لیے مزدوروں، مالکان اور حکومتی نمائندوں پرمشتمل تین فریقی بورڈکام کرتاہے حکومت اس میں کوئی مالی معاونت نہیں کرتی،جب سے یہ ادارہ وجود میں آیا ہے تب سے حکومتی نمائندے اور ادارے کی بیوروکریسی (افسرشاہی) نے اس ادارے میں کھربوں روپوں کی کرپشن کی ہے ادارے کے افسران سالانہ اربوں روپے کی تنخواہیں اورمراحات حاصل کرتے ہیں اور مزدوروں کی قلیل تعداد کوجو پنشن دی جاتی ہے اس پربھی انہیں بہت ذلیل اور خوار ہونا پڑتاہے،جان محمدبلیدی نے کہاکہ یکم جنوری 2020ء سے ای او بی آئی نے پنشن میں دوہزارروپے کامعمولی اضافہ کیا تھا اوراب اسے بھی واپس لے لیا گیا ہے، حکومت کے اس مزدوردشمن فیصلے کی جتنی بھی مذمت کی جائے کم ہے،انہوں نے کہاکہ حکومت ایک طرف تو ارب پتی لوگوں کو سبسڈی کے نام پرکھربوں روپے قومی خزانے سے دے رہی ہے اور دوسری طرف محنت کشوں کودی جانے والی حقیرپنشن میں بھی کٹوتی کی جارہی ہے جوکہ خلاف قانون اورمملکت کے آئین کے بھی خلاف ہے، جان محمدبلیدی نے کہا کہ خود کو عوامی نمائندے کہنے والے اور ریاست مدینہ کے دعوے دار کہلانے والوں کے لیے یہ بات کتنی شرمناک ہے کہ وزیراعظم، وزراء، مشیروں، ممبران پارلیمنٹ اور افسر شاہی کی تنخواہوں اور مراعات میں کروڑوں روپے کااضافہ کیاجاتا ہے اور مزدوروں کی پنشن میں دوہزارروپے کی کمی کی جاتی ہے،نیشنل پارٹی کے سیکریٹری جنرل نے تمام سیاسی جماعتوں اوران کے قائدین سے پرزور مطالبہ کیاہے کہ وہ ای او بی آئی کے چھ لاکھ پنشنرز اور ان کے خاندانوں کے خلاف ہونے والے اس ظلم پرمنظم اورموثراحتجاج کریں اورپارلیمنٹ میں اس مسئلہ کواٹھائیں انہوں نے کہاکہ ہمارایہ مطالبہ ہے کہ صنعتی مزدوروں کی کم ازکم پنشن 25000 روپے ماہوارمقررکی جائے۔