روس کا یوکرینی شہر باخموت کے ایک گاﺅں پر قبضے کا دعویٰ، یوکرین کا ردعمل سے گریز

ماسکو (مانیٹرنگ ڈیسک ) روس نے یوکرین کے شہر باخموت کے شمالی مضافات میں ایک گاﺅں پر قبضے کا دعوی کیا ہے تاہم یوکرین کی حکومت کی طرف سے فوری طور اس دعوے پر کوئی ردعمل سامنے نہیں آیا۔غیر ملکی خبر رساں ادارے کے مطابق روس کی وزارت دفاع نے ایک بیان میں کہا کہ بلہودتنے گاﺅںجو باخموت کے شمال میں تقریبا پانچ کلومیٹر کے فاصلے پر ہے اس پر قبضہ کر لیا گیا ہے۔دریں اثنا روس کے صدر ولادی میر پیوٹن نے بیلاروس کے ساتھ مشترکہ فوجی تربیتی مراکز قائم کرنے کے منصوبے کی حمایت کرتے ہوئے ان قیاس آرائیوں کو مسترد کر دیا کہ پڑوسی ملک کی افواج یوکرین میں ان کی فوج کے ساتھ لڑائی میں شامل ہو سکتی ہیں۔ پیوٹن نے وزیر دفاع اور خارجہ کو بیلاروس کے ساتھ بات چیت کرنے اور تنصیبات کے قیام کے لیے ایک معاہدہ طے کرنے کا حکم دیا ہے تاہم یہ نہیں بتایا گیا کہ مراکز کہاں قائم ہوں گے۔