اپوزیشن جماعتوں کا ناکام جلسہ کرسی کے حصول کی کوشش ہے، طلال چودھری

اسلام آباد، کوئٹہ (یو این اے) مسلم لیگ ن کے رہنما سینیٹر طلال چودھری نے کہا ہے کہ پشین جلسے سے ثابت ہو گیا کہ اپوزیشن کی تحریک شروع ہوتے ہی ناکام ہوگئی۔ ایک بیان میں طلال چودھری کا کہنا تھا کہ اپوزیشن جماعتوں کا ناکام جلسہ کرسی کے حصول کی کوشش ہے، اپوزیشن کو عوام کے مسائل سے کوئی سروکار نہیں۔ طلال چودھری کا کہنا تھا کہ کیا پشین جلسے میں نوشکی میں دہشت گردی کی کسی نے مذمت کی؟ کیا پشین جلسے میں کسی نے فلسطین پرکوئی بات کی؟ اور کیا کسی نے لوڈشیڈنگ، مہنگائی یا عوام کے مسائل پر بات کی؟ان کا کہنا تھا کہ یہ سب کرسی کا چکر ہے، یہ جلسوں سے عوام کو بے وقوف بنا رہے ہیں، پی ٹی آئی نے اپنے دور میں جو کیا عوام خمیازہ آج تک بھگت رہے ہیں، عوام گالم گلوچ کی سیاست نہیں اپنے مسائل کا حل چاہتے ہیں۔