وزیر اعلیٰ بلوچستان کی زیر صدارت اجلاس، ترقیاتی منصوبوں کی ڈی اے سی جلد مکمل کرنے کی ہدایت
کوئٹہ(این این آئی) وزیر اعلیٰ بلوچستان میر سرفراز بگٹی کی زیر صدارت آئندہ مالی سال کے بجٹ سے متعلق جائزہ اجلاس پیر کو یہاں وزیر اعلیٰ سیکرٹریٹ میں منعقد ہوا اجلاس میں صوبائی وزیر پلاننگ اینڈ ڈویلپمنٹ میر ظہور احمد بلیدی، وزیر خزانہ میر شعیب نوشیروانی ، چیف سیکرٹری بلوچستان شکیل قادر خان ، ایڈیشنل چیف سیکرٹری ترقیات حافظ عبدالباسط ، سیکرٹری خزانہ بابر خان، چیئرمین بلوچستان ریونیو اتھارٹی نور الحق بلوچ، پرنسپل سیکرٹری عمران زرکون، اسپیشل سیکرٹری اسفندیار بلوچ، ایڈیشنل سیکرٹری ڈویلپمنٹ چیف منسٹر سیکرٹریٹ عادل بگٹی اور متعلقہ حکام نے شرکت کی اجلاس سے خطاب کرتے ہوئے وزیر اعلٰی بلوچستان میر سرفراز بگٹی نے کہا کہ آئندہ مالی سال کے بجٹ میں تعلیم صحت اور بہتر سروس ڈلیوری صوبائی حکومت کی اولین ترجیحات ہیں تمام ترقیاتی منصوبوں کی ڈی اے سی ایک ماہ میں مکمل کر لی جائے ۔ وزیر اعلیٰ نے ہدایت کی کہ غیر سود مند آن گوئنگ ترقیاتی منصوبوں پر نظر ثانی کرکے دستیاب وسائل اجتماعی عوامی بہبود پر خرچ کئے جائیں انہوں نے کہا کہ ترقیاتی منصوبے عوامی ضروریات سے ہم آہنگ کرنے کے لئے پی ایس ڈی پی میں میجر سرجری کی ضرورت ہے بجٹ میں انفرادی منصوبوں اور پسند نہ پسند کے بجائے بلوچستان کے لوگوں کا اجتماعی مفاد سامنے رکھا جائے سیاسی مصلحتوں کے قطع نظر عوامی مفاد مدنظر رکھنا ضروری ہیں بجٹ کے ثمرات عام بلوچستانی تک پہنچنے چاہیں وزیر اعلٰی نے کہا کہ غیر ضروری آسامیوں کو اشد ضرورت کی حامل آسامیوں میں کنورٹ کیا جائے اور بڑھتے ہوئے غیر ترقیاتی اخراجات پر قابو پانے کیلئے جامع اور دیرپا حکمت عملی مرتب کی جائے ۔
