سرفراز بگٹی کی زیر صدارت بلوچستان میں محرم الحرام کے دوران سیکورٹی انتظامات سے متعلق اعلیٰ سطحی اجلاس
کوئٹہ ( آئی این پی )وزیراعلیٰ بلوچستان میر سرفراز بگٹی کی زیر صدارت صوبے میں محرم الحرام کے دوران سیکورٹی انتظامات سے متعلق اعلیٰ سطحی اجلاس منعقد ہوا جس میں صوبائی وزیر داخلہ ضیا اللہ لانگو ، چیف سیکرٹری بلوچستان ، آئی جی پولیس بلوچستان ، ڈی آئی جی پولیس کوئٹہ ،ڈی جی لیویز اور کمشنر کوئٹہ سمیت ڈویژنل کمشنرز کی بذریعہ وڈیو لنک شرکت کی۔ اجلاس میں متعلقہ حکام کی جانب سے صوبے میں محرم الحرام کے حوالے سے سیکورٹی انتظامات پر بریفنگ دی گئی ۔ اجلاس کے دوران وزیر اعلیٰ بلو چستان نے ہدایت کی کہ محرم الحرام کے جلوسوں اور مجالس کی مکمل سیکورٹی کے لیے ایس او پیز پر مکمل عملدرآمد کو یقینی بنا کر جلوسوں کے روٹس پر مرتب کردہ سیکیورٹی پلان پر پوری طرح سے عمل کیا جائے ۔ انہوں نے ڈویژنل کمشنرز اپنے اپنے ڈویژنز میں قانون نافذ کرنے والے اداروں کے ساتھ ملکر سیکورٹی انتظامات سے متعلق ایک مربوط لائحہ عمل تشکیل دینے کی بھی ہدایت کی اور کہا کہ ڈویژنل کمشنرز محرم الحرام کے حوالے سے لئے گئے سیکیورٹی انتظامات کی رپورٹ وزیر اعلی سیکرٹیریٹ ارسال کریں ۔ انہوں نے کہا کہ حساس اضلاع کی سیکورٹی کو مزید موثر بنایا جائے۔
