حکومت اور اپوزیشن کی جانب سے مثبت فیڈ بیک آ رہے ہیں، ایاز صادق

اسلام آباد (آئی این پی)اسپیکر قومی اسمبلی ایاز صادق نے کہا ہے کہ حکومت اور اپوزیشن کی جانب سے مثبت فیڈ بیک آ رہے ہیں۔پی ٹی آئی رہنما شیر افضل مروت کے ہمراہ میڈیا سے گفتگو کرتے ہوئے ایاز صادق نے کہا کہ جتنے زیادہ لوگ کھانے پر بیٹھیں برکت پڑ جاتی ہے۔انہوں نے کہا کہ کیفے کا ٹھیکہ دیا ہے، ٹیسٹ کے لیے آئے تھے، شیر افضل مروت بھی آ گئے۔ایاز صادق نے کہا کہ مذاکرات میں کوشش یہی ہوتی ہے، میں نے سہولت فراہم کرنی ہے، ہم ان شا اللہ جب بیٹھیں گے تو مسئلے کا حل بھی نکلے گا۔انہوں نے کہا کہ ہم سب پاکستانی ہیں ہم سب کا اولین فرض ہے کہ عوام اور پاکستان کی بہتری کی بات کریں، پچھلی میٹنگ میں بھی میثاق معیشت پر بات کی تھی، یہ مذاکرات ایک دوسرے کے ساتھ تلخیاں ختم کریں گے۔اسپیکر قومی اسمبلی کا یہ بھی کہنا ہے کہ ہم عوام کے مسائل ضرور اٹھائیں گے اور میثاق معیشت پر بھی بات ہو گی، اپوزیشن اور حکومت اپنے اپنے مطالبات پیش کرنے ہیں، میں نے سہولت دینی ہے۔