درالعلوم حقانیہ دھماکہ، وفاق افغانستان سے بات چیت کے ٹی او آرز جلد منظور کرے، کے پی حکومت کا مطالبہ

مانیٹر نگ ڈیسک : اکوڑہ خٹک دھماکے کے بعد خیبر پختونخوا حکومت نے وفاق سے افغانستان سے بات چیت سے متعلق ٹی او آرز جلد از جلد منظور کرنے کا مطالبہ کردیا۔ڈان نیوز کے مطابق ترجمان خیبرپختونخوا حکومت بیرسٹر محمد سیف نے کہا ہے کہ وفاق افغانستان سے بات چیت کے لیے خیبر پختونخوا حکومت کے ٹرمز آف ریفرنسز (ٹی او آرز) جلد از جلد منظور کرے۔انہوں نے کہا کہ وفاق ٹی او آرز کی منظوری میں مزید تاخیر سے گریز کرے، خیبر پختونخوا حکومت ہنگامی بنیادوں پر وفد افغانستان بھیجنا چاہتی ہے، اپنے عوام کے جان و مال کی حفاظت خیبر پختونخوا حکومت کی اولین ترجیح اور ذمہ داری ہے۔بیرسٹر سیف نے واضح کیا کہ وفاق خیبرپختونخوا میں دہشت گردی کی روک تھام کے بجائے اس اہم مسئلے پر سیاست کرنے سے گریز کرے، وفاق کو پنجاب اور سندھ کے وزرائے اعلیٰ کے بیرونی دوروں پر کوئی اعتراض نہیں؟۔انہوں نے کہا کہ وزیراعلیٰ پنجاب مریم نواز بھارت سے اسموگ ڈپلومیسی کر سکتی ہیں تو دہشت گردی جیسے اہم مسئلے پر خیبر پختونخوا حکومت کی افغانستان سے بات چیت میں کیا حرج ہے؟ وفاق کی اس دوغلی پالیسی سے صوبے کی احساس محرومی مزید بڑھ رہی ہے۔