پی بی 36 قلات میں ری پولنگ، الیکشن کمیشن کا اجلاس، حلقے میں ایف سی اور فوج کی تعیناتی پر غور
کوئٹہ (اسٹاف رپورٹر) صوبائی الیکشن کمشنر بلوچستان علی اصغر سیال کی زیر صدارت صوبائی اسمبلی بلوچستان کے حلقہ پی بی 36 قلات کے 7 پولنگ اسٹیشنوں پر 10 مارچ 2026 کو ہونے والی ری پولنگ کے حوالے سے اعلیٰ سطحی اجلاس دفتر صوبائی الیکشن کمشنر بلوچستان کوئٹہ میں منعقد ہوا۔ اجلاس میں جوائنٹ صوبائی الیکشن کمشنر بلوچستان سید وسیم احمد جعفری، کمشنر قلات ڈویژن طفیل احمد بلوچ، ڈی آئی جی قلات وزیر خان ناصر، ڈائریکٹر الیکشن عبداللہ، ڈائریکٹر ایڈمن نعیم احمد ، ریجنل الیکشن کمشنر قلات ڈویژن سکند ر علی جمالی ، ڈی آر او/ڈپٹی کمشنر قلات منیر احمد درانی، ریٹرننگ افسر پی بی 36 شاہ نواز بلوچ، ایس پی قلات سید زاہد حسین شاہ ودیگر افسران نے شرکت کی۔ اجلاس میں متعلقہ 7 پولنگ اسٹیشنوں پر الیکشن کو شفاف اور پر امن طریقے سے کرانے کے انتظامات کا تفصیلی جائزہ لیا گیا اور انتہائی حساس پولنگ اسٹیشنوں پر فوج اور ایف سی اہلکاروں کی تعیناتی کے امور بھی زیر بحث آئے۔ اس موقع پر صوبائی الیکشن کمشنر علی اصغر سیال نے کہا کہ غیر جانبدار اور مستند انتخابی عملے کی تعیناتی کو یقینی بنایا جائے اور سیکورٹی کے فول پروف انتظامات کیے جائیں، جبکہ پولنگ اسٹیشنوں پر ووٹرز کو پرامن ماحول فراہم کرنے میں کوئی کسر نہ چھوڑی جائے تاکہ تمام ووٹرز آزادانہ ماحول میں اپنا حق رائے دہی استعمال کرسکیں۔
