کوہلو میں محکمہ خوراک غیر فعال، سرکاری گودام گزشتہ دس سال سے بند
کوہلو (انتخاب نیوز) کمر توڑ مہنگائی کے باوجود ضلع کوہلو میں محکمہ خوراک غیر فعال، دس سال گزر جانے کے باوجود سرکاری گودام کے دروازے نہیں کھل سکے۔ ملک بھر کی طرح بلوچستان کے ضلع کوہلو میں بھی مہنگائی کا جن بوتل سے باہر نکل آیا، صوبائی حکومت کی نااہلی سے محکمہ خوراک مکمل غیر فعال ہے۔ ڈپٹی کمشنر ہاؤس کے عقب میں موجود محکمہ خوراک کا گودام گزشتہ دس بارہ سال سے بند پڑا ہے، اب تو یہ بھی کسی کو علم نہیں کہ اس کے ذمہ داران کون ہیں۔ عوامی حلقوں نے کئی مرتبہ ڈپٹی کمشنر کوہلو کو بھی آگاہ کیا لیکن کوئی شنوائی نہیں ہوسکی۔ عوامی سماجی حلقوں کی جانب سے منتخب صوبائی وزیر تعلیم میر نصیب اللہ مری، چیف سیکرٹری بلوچستان، کمشنر سبی ڈویژن سے اپیل کرتے ہوئے کہا گیا کہ خدارا عوام پر رحم کھا کر سرکاری گودام کو فوری کھلوا کر شہریوں کو سستے دام گندم کی ترسیل کی جائے تاکہ مہنگائی کی چکی میں پسنے والے افراد کو کچھ ریلیف مل سکے۔
