قلعہ عبداللہ میں سیلاب سے جانی و مالی نقصان پر وزیراعظم کا اظہار افسوس
کوئٹہ (انتخاب نیوز) وزیراعظم شہباز شریف کا بلوچستان کے علاقے ضلع قلعہ عبداللہ میں حالیہ بارشوں اور سیلاب کے نتیجے میں جانی و مالی نقصان پر گہرے دکھ اور تشویش کا اظہار کرتے ہوئے این ڈی ایم اے، پی ڈی ایم اے اور بلوچستان حکومت کو امدادی کارروائیوں کو تیز کرنے کی ہدایت کی ہے۔ وزیراعظم محمد شہباز شریف کی سیلاب سے متاثرہ علاقوں کے حوالے سے فوری طور پر رپورٹ پیش کرنے کی ہدایت۔ وزیرِاعظم نے سیلاب سے دو بند ٹوٹنے اور نقصان کے مکمل تخمینے کے بعد رپورٹ پیش کرنے کی ہدایات جاری کردیں۔ وزیرِاعظم کا جلد قلعہ عبداللہ کے سیلاب زدہ علاقوں کا دورہ بھی متوقع ہے۔ وزیراعظم اس سے قبل جھل مگسی، قلعہ سیف اللہ اور چمن میں سیلاب متاثرہ علاقوں کا دورہ کرچکے ہیں۔ وزیراعظم نے سیلاب میں پھنسے لوگوں کو محفوظ مقامات پر پہنچانے کی بھی ہدایت کی ہے۔ وزیراعظم محمد شہباز شریف نے سیلاب متاثرین کی رہائش کیلئے خیمہ بستیاں اور کھانے پینے کی اشیا کا فوری انتظام یقینی بنانے کی بھی ہدایت جاری کیں۔
