34ویں نیشنل گیمز کا انعقاد، جوڈو کے مقابلے کوئٹہ میں ہوں گے

کوئٹہ : 34ویں نیشنل گیمز میں شامل جوڈو کے مقابلے کوئٹہ میں ہی کرانے کا فیصلہ ۔تفصیلات کے مطابق 34ویں نیشنل گیمز میں شامل جوڈو کے مقابلے شیڈول کے مطابق کوئٹہ میں ہونے تھے لیکن کچھ وجوہات کی بنا پر پاکستان اولمپک ایسوسی ایشن نے لاہور منتقل کرنے کا فیصلہ کیا جس کی وجہ سے میزبان صوبے کے کھلاڑی کافی مایوس ہوئے، بلوچستان جوڈو ایسوسی ایشن کے جنرل سیکرٹری نوراحمد رند نے سیکرٹری کھیل محمد اسحاق جمالی، ڈائریکٹر جنرل کھیل دُرا بلوچ، پاکستان اولمپک ایسوسی ایشن کے جنرل سیکرٹری خالد محمود اور جوڈو چمپئن شپ کمیٹی کے چیرمین وسیم دین ہاشمی کے ساتھ جوڈو کے مقابلوں کے حوالے سے ملاقات کی جس میں جوڈو کے مقابلوں کا لاہور منتقل ہونے کی وجوہات پر بات چیت ہوئی جس کے بعد محکمہ کھیل حکومت بلوچستان اور پاکستان اولمپک ایسوسی ایشن کے ساتھ معاملات طے پا گئے اور فیصلہ کیا گیا کہ تمام مسائل کو حل کیا جائے گا اور جوڈو کے مقابلے کوئٹہ میں ہی شیڈول کے مطابق منعقد ہونگے، بلوچستان جوڈو ایسوسی ایشن کے صدر ڈاکٹر بشیر بابی صاحب اور جنرل سیکرٹری نوراحمد نے سیکرٹری کھیل محمد اسحاق جمالی، ڈائریکٹر جنرل کھیل دُرا بلوچ اور پی او اے کے جنرل سیکرٹری خالد محمود کا خصوصی شکریہ ادا کیا اور کہا کہ محکمہ کھیل حکومت بلوچستان اور پاکستان اولمپک ایسوسی ایشن کے ساتھ مل کر نیشنل گیمز کو کامیاب بنانے کی بھرپور کوشش کریں گے۔