کراچی میں عمران خان کے نام سے منسوب گراﺅنڈ سیل کردیا گیا

کراچی (این این آئی) کراچی کے علاقے گلشنِ اقبال میں قائم عمران خان کرکٹ گراﺅنڈ کو ضلعی انتظامیہ نے سیل کردیا۔انتظامیہ کے مطابق نوٹس دینے کے باوجود گراﺅنڈ میں سیاسی جماعت کی جانب سے کمرشل سرگرمیاں جاری تھیں۔ ترجمان پی ٹی آئی نے کارروائی کو سندھ حکومت کی جانب سے انتقامی کارروائی قرار دیا ہے۔گلشن اقبال میں ضلعی انتظامیہ شرقی نے پراپرٹی پر قبضے کے خلاف ایڈمنسٹریٹر شکیل احمد کی سربراہی میں تجاوزات کیخلاف کارروائی کرتے ہوئے عمران خان کرکٹ گراﺅنڈ کا قبضہ چھڑوا کر ضلعی انتظامیہ کے حوالے کردیا۔ایڈمنسٹریٹر ضلع شرقی ایڈمنسٹریٹر شکیل احمد نے بتایاکہ گراﺅنڈ کا نام، تختی سب ہٹا کر یہاں ضلعی انتظامیہ کا بورڈ لگایا جائے گا۔ دو سال سے گرانڈ میں سیاسی جماعت کی جانب سے کمرشل سرگرمیاں جاری تھیں۔ نوٹس کے باوجود پارک خالی نہیں کیا گیا جبکہ سپریم کورٹ کے واضح احکامات ہیں پارکوں کو اصل حالت میں لانا ہے اسی لیے آپریشن کیا۔ انہوں نے کہا کہ گرانڈ میں تحریک انصاف کے ایم این اے عالمگیر خان کی تختی بھی آویزاں تھی۔دوسری جانب ترجمان پی ٹی آئی نے کہاکہ سندھ حکومت کی پی ٹی آئی کے خلاف انتقامی کارروائیاں جاری ہیں۔ گلشن اقبال میں عوام کے پیسے سے بنائے عمران خان کرکٹ گرانڈ میں کے ایم سی نے آپریشن کیا۔ پہلے رہنماﺅں کے ذاتی کاروبار اور اب عوامی املاک کو نقصان پہنچایا جارہا ہے۔ترجمان پی ٹی آئی نے کہا کہ اس گرانڈ کو اس لیے ختم کیا جارہا ہے کیونکہ یہ عمران خان کے نام سے منسوب ہے۔ حکومت املاک کو نقصان پہنچا سکتی ہے لیکن عوام کے دلوں سے عمران خان کو نکالنا ممکن نہیں ہے۔