بلوچستان میں مسلط کردہ نمائندے اور وزراءزمینوں پر قبضے کررہے ہیں، ان سے ایک سڑک نہیں پن پارہی، ڈاکٹر مالک

تربت (انتخاب نیوز) نیشنل پارٹی کے مرکزی صدر سابق وزیراعلیٰ بلوچستان ڈاکٹرعبدالمالک بلوچ نے کہاکہ نیشنل پارٹی کے مینڈیٹ پرکسی بھی صورت شب خون مارنے کی اجازت نہیں دیں گے، عوام کی طاقت سے عوام دشمنوں کو ایسی شکست سے دوچارکریں گے کہ جسے وہ کبھی بھلا نہیں پاسکیں گے، ہم نے سیاست میں بہت سارے نشیب وفرازدیکھے ہیں، کٹھن ومشکل دور گزارے ہیں ہم پروہ دن بہت سخت گزرا جس دن شہید مولابخش دشتی کو شہید کیاگیا مشکل حالات کا جوان مردی سے مقابلہ کریں گے، ان خیالات کا اظہار انہوں نے منگل کی شام تربت میں نیشنل پارٹی کیچ کے زیراہتمام شہید مولابخش دشتی اور مرحوم قاضی غلام رسول بلوچ کی یادمیں منعقدہ عظیم جلسہ عام سے خطاب کرتے ہوئے کیا، جلسہ میں مردوخواتین ہزاروں کی تعدادمیں شریک تھے، ڈاکٹر عبدالمالک بلوچ نے کہاکہ شہید مولابخش دشتی اورمرحوم قاضی غلام رسول بلوچ ایک فکر اورنظریہ کانام ہیں یہ ہمیشہ کیلئے امر ہیں، شہید مولابخش دشتی اورمرحوم قاضی غلام رسول اپنے عوام میں سرخرو ہیں، یہ بلوچ قومی تاریخ کے درخشان ستارے ہیں، مولابخش دشتی نے جان کی قربانی دی اورمگر اپنے اصولوں سے روگردانی نہ کی اورمرحوم قاضی غلام رسول بلوچ نے کوڑے کھائے مگر معافی نامہ لکھ کرنہ دیا، بلوچ نوجوان، بزرگ، خواتین شہید مولابخش دشتی اورمرحوم قاضی غلام رسول کے فکر ونظریہ کی روشنی میں جدوجہد کو آگے بڑھائیں کیونکہ اس وقت بلوچ کے خلاف ہر طرف سے سازشیں کی جارہی ہیں قوم پرستی کی سیاست کو ختم کرنے کی کوشش کی جارہی ہے مگر نیشنل پارٹی بلوچ اوربلوچستان کے خلاف کسی بھی سازش کا ڈٹ کرمقابلہ کرے گی، انہوں نے کہاکہ مسلط کردہ نمائندے اور وزراءکی بہتات کے باوجود لوگ ڈینگی سے مررہے ہیں، ایک سڑک سالوں تک تعمیر نہیں ہوتی، ان کی توجہ صرف دولت جمع کرنے اور زمینوں پر قبضہ پر ہے، یہی وجہ ہے کہ آج قبرستان کیلئے بھی زمین دستیاب نہیں، سب انہی نے قبضہ کئے ہیں، نوکریاں فروخت کی جارہی ہیں، غریب کیلئے ملازمتوں کے دروازے بندکردئیے گئے ہیں ہم نے غریب اورمحنتی نوجوانوں کی حوصلہ افزائی کیلئے میرٹ کو یقینی بناکر این ٹی ایس کے ذریعے ٹیسٹ منعقد کرائے، بلوچستان پبلک سروس کمیشن کو مضبوط بنایا، نیشنل پارٹی کے مرکزی سیکرٹری جنرل جان محمدبلیدی نے جلسہ عام سے خطاب کرتے ہوئے کہاکہ ہم سمجھتے ہیں کہ اسلام آباد نے ہمارے حقوق غصب کررکھے ہیں مگر جونام نہاد نمائندے ہم پرمسلط ہیں یہ اس میں شریک جرم ہیں، بلوچستان کی محرومیوں اورمایوسیوں میں اضافہ کی وجہ یہی مسلط کردہ لوگ ہیں بھوک، افلاس، غربت اوربدحالی وبے روزگاری پھیلانے میں ان کا کردار شرمناک ہے یہ عوام کے مفاد کے بجائے صرف اپنا فائدہ دیکھتے ہیں یہ اپنے کمیشن اور فائدے کیلئے اربوں روپے گیشکور ڈیم کے نام پر لٹارہے ہیں۔ انہوں نے کہاکہ بلوچ کامسئلہ قومی تشخص، قومی وجود وبقاءاور عزت ووقارکا ہے، وسائل پر حق واختیار کا ہے موجودہ دور بلوچ سیاست کامشکل ترین دور ہے قوموں کی حق حکمرانی کی جدوجہد پرمبنی سیاسی تحریک کو مضبوط بنانے کی ضرورت ہے اس سیاسی تحریک کو تقسیم درتقسیم کا شکار بنانے کیلئے مختلف ہتھکنڈے آزمائے جارہے ہیں نیشنل پارٹی کے سامنے بند باندھنے کی کوششیں کی جارہی ہیں نیشنل پارٹی ایک اصول پسند سیاسی جماعت ہے نیشنل پارٹی اقتدار اورکرسی کے بجائے بلوچ قومی مفادات کوہمیشہ مقدم رکھتی ہے،2002ءمیں نیشنل پارٹی کو اقتدار کی پیشکش کی گئی مگر نیشنل پارٹی نے اسے ٹھکرادیا، 2023ءکے الیکشن میں نیشنل پارٹی کا راستہ روکنا اب ممکن نہیں، عوام کے زور پر انتخابی میدان میں بھرپور کامیابی سمیٹیں گے کیونکہ عوام نے لوٹ مار اورکرپشن کا راستہ روکنے کیلئے اورمیرٹ اورتعلیم کے فروغ کیلئے ڈاکٹر مالک کولانے کا فیصلہ کرلیاہے، جلسہ عام سے بی ایس او پجارکے مرکزی چیئرمین بوہیر صالح، سینیٹر کہدہ اکرم دشتی، مرکزی فنانس سیکرٹری حاجی فداحسین دشتی، واجہ ابوالحسن، مرکزی سیکرٹری خواتین یاسمین لہڑی، مرکزی سیکرٹری ہیومن رائٹس میر شاوس بزنجو، سابق سینیٹر منظور احمد گچکی جسٹس (ر) شکیل احمدبلوچ، بی ایس او پجارکے سیکرٹری جنرل ابراربرکت، میڈم طاہرہ خورشید، میونسپل کارپوریشن تربت کے میئر بلخ شیرقاضی، محمد جان دشتی، مشکور انور نے بھی خطاب کیا مقررین نے کہاکہ بڑی بڑی باتیں کرنے والوں کا اصل چہرہ حالیہ بلدیاتی الیکشن میں بے نقاب ہوگیا جنہوں نے ایوب بلیدی، شہید حمید اورکریم دشتی کی بھی لاج نہیں رکھی، ان کاکہنا تھا کہ اسمبلیاں ختم ہوتے ہی سیاسی فضاءیکسر بدل جائے گی، نام نہاد وزراءکو اگلے الیکشن میں الیکشن لڑنے کی جرات بھی نہیں ہوگی، بلوچستان کا مسئلہ وسائل کانہیں بلکہ حق حاکمیت کا ہے بلوچستان کو وسائل پر اختیار دیاجائے، ہر پانچ سال بعد بلوچستان کو ٹھیکہ پر دیاجاتاہے نیشنل پارٹی اس ٹھیکیداری نظام کو شکست دینے کیلئے میدان میں ہے، جلسہ عام میں اسٹیج سیکرٹری کے فرائض بی ایس او پجارکے سابق چیئرمین گہرام اسلم نے سرانجام دئیے۔