جاپان نے پاکستان کو شکست دیکر پہلی مرتبہ اذلان شاہ ہاکی ٹورنامنٹ جیت لیا

کراچی (مانیٹرنگ ڈیسک) اذلان شاہ ہاکی ٹورنامنٹ کے فائنل میں جاپان نے پاکستان کو شکست دے دی۔ ملائیشیا کے شہر ایپوہ میں کھیلا گیا فائنل میچ چوتھے کوارٹر میں 2 -2 گول سے برابر رہا جس کے بعد پینالٹی شوٹ آﺅٹ پر فیصلہ ہوا۔ جاپان نے پینالٹی شوٹ آﺅٹ مقابلہ 1-4 سے جیت کر پہلی بار اذلان شاہ ہاکی ٹورنامنٹ کا ٹائٹل حاصل کرلیا۔ جاپان کی ٹیم پہلی بار اذلان شاہ کپ کا فائنل کھیل رہی تھی۔ جاپان نے پہلے کوارٹر میں پاکستان کے خلاف ایک صفر کی برتری حاصل کی جب کہ دوسرے کوارٹر میں دونوں ٹیمیں کوئی گول اسکور نہ کرسکیں۔ تیسرے کوارٹر میں پاکستان نے 1-2 کی برتری حاصل کرلی۔ پاکستان کے احمد اعجاز نے 34 ویں اور عبدالرحمان نے37 ویں منٹ میں گول کیا۔ جاپان نے چوتھے کوارٹر میں میچ 2-2 سے برابر کردیا۔ جاپان کی جانب سے دوسرا گول کازوماسما نے 47 ویں منٹ میں اسکور کیا۔ چوتھے کوارٹر میں پاکستان کو برتری حاصل کرنے کے متعدد مواقع ملے تاکم قومی ٹیم اس کا فائدہ نہ اٹھاسکی۔ واضح رہے کہ پینالٹی شوٹ آﺅٹ میں 8 سیکنڈ کے اندر گول کرنا ہوتا ہے۔ پاکستان نے 5 میں سے 2 پینالٹی شوٹ آﺅٹ ضائع کیے۔ پینالٹی شوٹ آﺅٹ پر پاکستان کا واحد گول عماد بٹ نے کیا، پینالٹی شوٹ آﺅٹ میں پاکستان کے رانا وحید اور ارشد لیاقت نے گول مس کیے۔ خیال رہے کہ پاکستان نے 2011ءمیں آخری بار اذلان شاہ ہاکی ٹورنامنٹ کا فائنل کھیلا تھا۔ پاکستان نے ٹورنامنٹ آخری بار 2003 میں جیتا تھا۔