ٹرمپ کے قتل کی سازش ایران میں ہونے کی اطلاعات تھیں، امریکی حکام
واشنگٹن (مانیٹرنگ ڈیسک) امریکی حکام نے دعویٰ کیا ہے کہ انہیں سابق صدر ٹرمپ کے قتل کی سازش ایران میں ہونے کی انٹیلی جنس اطلاعات موصول ہوئی تھیں۔ امریکی میڈیا کے مطابق امریکی حکام نے دعویٰ کیا ہے کہ انہیں حالیہ ہفتوں میں ہی ایک انٹیلی جنس اطلاع موصول ہوئی تھی جس میں سابق صدر ٹرمپ کے قتل کی ایران میں منصوبہ بندی کی اطلاعات تھیں، خفیہ ذرائع نے بتایا تھا کہ ایران ڈونلڈ ٹرمپ کو قتل کروانے کی سازش کرسکتا ہے۔ امریکی میڈیا کا بتانا ہے کہ انٹیلی جنس اطلاعات میں ٹرمپ پر حملہ کرنے والے 20 سالہ حملہ آور تھامس میتھیو کا ایران میں کی جانے والی منصوبہ بندی سے کوئی تعلق نہیں بتایا گیا تھا۔ امریکی قومی سلامتی کے اہلکار کا کہنا ہے کہ سیکرٹ سروس اور ٹرمپ الیکشن ٹیم کو ریلی سے پہلے خطرے سے آگاہ کردیا گیا تھا۔ ٹرمپ کی الیکشن ٹیم نے قتل کے منصوبے یا سازش کا علم ہونے کی تصدیق کرنے سے گریز کرتے ہوئے کہا ہے کہ ٹرمپ کی سیکورٹی کی تفصیلات پر تبصرہ نہیں کرتے، تمام سوالات امریکی سیکریٹ سروس کو بھیجے جائیں۔ دوسری جانب ایران نے امریکی انٹیلی جنس کی رپورٹ کو مسترد کرتے ہوئے اسے بدنیتی قرار دیا ہے۔
