چین کے ویزا فری ممالک کی فہرست میں مزید 9 ممالک شامل، پاکستان شامل نہیں

بیجنگ(یو این اے)چین نے سیاحت اور بین الاقوامی تعلقات کی فروغ کے لیے ویزا فری ممالک کی فہرست میں مزید 9 ملک شامل کر لیے ہیں۔ میڈیانے چین کی وزارت خارجہ کے حوالے سے بتایا کہ اب جنوبی کوریا، ناروے، فن لینڈ، سلواکیا، ڈنمارک، آئس لینڈ، اندورا، موناکو اور لیکٹنسٹائن کے شہری چین میں بغیر ویزا کے داخل ہو سکیں گے۔ چین کی وزارت خارجہ کے مطابق 8 نومبر سے ان ممالک کے شہری کاروبار، سیاحت، خاندان کے لوگوں سے ملاقات یا ٹرانزٹ کے لیے چین میں ویزا کے بغیر داخل ہو سکیں گے۔ یہ پالیسی آئندہ سال کے آخر تک نافذ رہے گی جس کے بعد چین کی ویزا فری فہرست میں کل ممالک کی تعداد 25 ہو جائے گی۔چین کورونا وائرس کی وبا کے بعد گزشتہ سال سے غیر ملکی شہریوں پر عائد سفری پابندیوں میں نرمی کر رہا ہے تاکہ ملکی معیشت میں مثبت رجحان آئے اور امریکا، یورپ اور ایشیائی ممالک کے ساتھ تنا کم کیا جا سکے۔ اس سے قبل فرانس اور جرمنی سمیت 16 ممالک کے شہریوں کو کاروبار، سیاحت، فیملی وزٹ اور ٹرانزٹ کے لیے 15 دن تک بغیر ویزے کے چین میں داخل ہونے کی اجازت تھی۔ دوسری جانب امریکا، کینیڈا اور برطانیہ سمیت مزید 54 ممالک کے شہریوں کو چین کی 37 داخلی بندرگاہوں میں سے کسی ایک کے ذریعے ملک میں داخل ہونے اور بغیر ویزا کے 72 یا 144 گھنٹے تک قیام کرنے کی اجازت ہے، بشرط یہ کہ ان کے پاس کسی دوسرے ملک کا آن ورڈ ٹکٹ موجود ہو۔ نیشنل امیگریشن ایڈمنسٹریشن کے مطابق رواں سال کی پہلی ششماہی میں ایک کروڑ 40 لاکھ سے زائد غیر ملکیوں نے چین کا دورہ کیا جوسال ہا سال 152 فیصد کا اضافہ ہے۔ رواں سال جنوری سے جون تک 85 لاکھ سے زیادہ ویزا فری داخلے ریکارڈ کئے گئے ، جو اندرون ملک چین کے سفر کا 58 فیصد بنتا ہے۔ جولائی سے ستمبر کے دوران 81 لاکھ سے زائد غیر ملکیوں نے چین کا دورہ کیا جن میں سے 49 لاکھ ویزا فری داخلے تھے۔