سعودی عرب میں 19 ہزار غیر قانونی تارکین وطن اور 22 سہولت کار گرفتار

ریاض (این این آئی)سعودی عرب میں غیر قانونی تارکین وطن کے خلاف کام کرنے والی مشترکہ کمیٹی نے کارروائی کرتے ہوےئے ایک ہفتے کے دوران 19ہزار غیر قانونی تارکین وطن کو گرفتار کر لیا۔عرب میڈیا کے مطابق غیر قانونی تارکین وطن کے خلاف کام کرنے والی مشترکہ کمیٹی کی جانب سے جاری بیان میں کہا گیا ہے کہ یہ گرفتاریاں 17 اپریل سے 23 اپریل 2025 کے درمیان ہوئی ہیں، جن میں سے 11245 اقامہ قوانین کی خلاف ورزی،4297 گرفتار شدگان سرحدی قوانین کی خلاف ورزی ،جبکہ 3786 تارکین وطن لیبر قوانین کی خلاف ورزی اور 1360 افراد سرحد عبور کرنے کے الزام میں گرفتار کئے گئے۔گرفتار افراد میں سے 44 فیصد یمنی، 54 فیصد ایتھوپی جبکہ دوفیصد دیگر ممالک کے تارکین شامل ہیں۔ کمیٹی نے کہا ہے کہ غیر قانونی تارکین وطن کو سہولت فراہم کرنے پر 22 افراد گرفتار کئے گئے ہیں۔دوسری جانب سعودی وزارت داخلہ نے کہا کہ غیر قانونی تارکین وطن کو کسی بھی قسم کی سہولت فراہم کرنا سنگین جرم ہے جس پر 15 سال قید اور 10 لاکھ ریال جرمانہ ہوسکتا ہے۔