مولانا فضل الرحمن میرے بھائی کیخلاف الیکشن جیت کر دکھائیں، گنڈا پور کا چیلنج علی امین خود فارم 47 کے وزیراعلیٰ اور کچھ ماہ کے مہمان ہیں، ترجمان جے یو آئی

کراچی (ویب ڈیسک) علی امین گنڈا پور نے مولانا فضل الرحمان کو کھلا چیلنج دے دیا۔ لاہور میں پارٹی رہنماو¿ں کے ہمراہ پریس کانفرنس کرتے ہوئے علی امین گنڈا پور کا کہنا تھا مولانا فضل الرحمان کہتے ہیں ہمارا مینڈیٹ جعلی ہے، مولانا خود فارم 47 سے جیت کر آئے۔ علی امین گنڈا پور کا کہنا تھا مولانا فضل الرحمان کو چیلنج ہے میرے بھائی کے خلاف الیکشن جیت کر دکھائیں، مولانا فضل الرحمان نہ جیت سکے تو سیاست چھوڑ دیں۔ علاوہ ازیں ترجمان جمعیت علمائے اسلام (جے یو آئی) ف خیبر پختون خوا مولانا عبدالجلیل جان نے علی امین گنڈاپور کے بیان پر ردِعمل دیتے ہوئے کہا ہے کہ علی امین گنڈاپور خود فارم 47 کے وزیرِ اعلیٰ ہیں، وہ خود چند ماہ کے مہمان ہیں جس کا اعلان انہوں نے خود لاہور میں کر دیا ہے۔ اپنے بیان میں ترجمان جے یو آئی ف خیبرپختونخوا عبدالجلیل جان نے کہا کہ علی امین گنڈاپورکا باجوڑ جانے کی بجائے لاہور میں سیر سپاٹا انتہائی شرم ناک ہے، سرکاری خزانے سے لاہور کا ٹوور کرنے والوں سے حساب لیا جائے گا۔ انہوں نے کہا کہ مولانا فضل الرحمٰن کے حقیقت پر مبنی بیان نے وزیرِ اعلیٰ کی ڈرامے بازی پر پانی پھیر دیا ہے، بڑھکوں اور ڈرامے بازیوں کی بجائے وزیرِ اعلیٰ صوبے میں امن و امان کی فکر کریں۔ ترجمان جے یو آئی ف نے کہا کہ اس وقت علی امین پی ٹی آئی کو ختم کرنے کی ذمے داری احسن طریقہ سے انجام دے رہے ہیں۔