سیلاب سے متاثر حب کینال کی مرمت کرکے پانی چھوڑ دیا گیا، کراچی کو فراہمی شروع

کراچی (انتخاب نیوز) میئر کراچی مرتضیٰ وہاب نے کہا کہ حب ڈیم سے کراچی کو پانی فراہم کرنے والی حب کینال میں مرمت کے بعد پانی چھوڑ دیا گیا ہے، رواں ہفتے بارش کے دوران حب کینال ٹوٹ پھوٹ کا شکار ہوگئی تھی۔ میئر کراچی مرتضیٰ وہاب نے ایک بیان میں کہا ہے کہ سیلاب سے متاثرہ حب کینال میں آج صبح پانی چھوڑ دیا گیا ہے۔ انہوں نے کہاکہ حب کینال بدھ کو ہونے والی بارش اور برساتی ریلے سے متاثر ہوئی تھے، اطراف کی مٹی بہہ جانے کے باعث کینال ٹوٹ پھوٹ کا شکار ہوئی تھی۔ مرتضیٰ وہاب نے کہا کہ حب کینال کےاطراف کی مٹی پانی میں بہہ جانے کے باعث کینال ٹوٹ پھوٹ کا شکار ہوئی اور اس کا 20 میٹر کا حصہ متاثر ہوگیا تھا۔ میئر کراچی مرتضیٰ وہاب نے بتایا کہ شہریوں کو حب ڈیم سے پانی کی فراہم صبح 7 بجے سے شروع کردی گئی ہے۔